Фарғона вилоятида Иккинчи жаҳон уруши қатнашчиларига президентнинг байрам табриги ҳамда 15 миллион сўмдан пул мукофоти топширилди, дея хабар берди «Дарё» мухбири Азизжон Эрматов.
Маълум қилинишича, вилоят ҳокими Хайрулла Бозоров, Шарқий ҳарбий округ қўшинлари қўмондонлиги, Мудофаа ва хавфсизлик тизимлари раҳбарлари, вилоят секторлари раҳбарлари ва жамоатчилик вакиллари вилоятнинг шаҳар ва туманларида бўлиб, уруш қатнашчилари ҳолидан хабар олган.
Риштонлик Абдулҳай ота Азизов Москва остоналарида бўлган жангларда иштирок этган. Урушдан қайтгач, 53 йил халқ таълими соҳасида меҳнат қилган. Абдулҳай отага президент табриги, пул мукофоти ва қимматбаҳо совғалар топширилди.
Бувайдалик Кенжабой ота Эгамқулов вилоят ҳокими ва меҳмонларни очиқ чеҳра билан кутиб олди. Отахон суҳбат давомида уруш даврида бошидан ўтказган синовлар, қийинчиликлар, кўрсатган қаҳрамонликлари ҳақида сўзлаб берди.
Кенжабой ота 1943 йил ноябрь ойида жанговор топшириқларни бажариш чоғида чап оёғидан ярадор бўлиб Ватанга қайтган. Урушдан кейин 1945 йилдан 1984 йилгача турли масъул лавозимларда фаолият олиб борди. Кенжабой ота урушда кўрсатган қаҳрамонликлари учун қатор орден ва медаллар билан тақдирланган.
Учкўприклик Деҳқонбой ота Қурбонов 98 ёшни қаршилади. Минглаб ўзбекистонликлар қатори у ҳам қўлига қурол олиб, душманга қарши курашган. Урушдан кейин темир йўл тизимида ишлаган.
Турмуш ўртоғи Мўътабархон ая билан 5 қиз, 1 ўғилни тарбиялади. Ҳозирда отахон 100 дан зиёд набира-ю, чевара-эваралар қуршовида бугунги тинч-осойишта ва фаровон ўтаётган ҳар бир кун учун шукрона айтиб яшамоқда.
Тантанали тадбирлар давомида уларга ҳам вилоят раҳбари томонидан президент табриги ва байрам совғалари топширилган.
Қайд этилишича, айни кунда вилоятда 28 нафар уруш қатнашчиси истиқомат қилади.
Изоҳ (0)