Farg‘ona viloyatida Ikkinchi jahon urushi qatnashchilariga prezidentning bayram tabrigi hamda 15 million so‘mdan pul mukofoti topshirildi, deya xabar berdi “Daryo” muxbiri Azizjon Ermatov.
Ma’lum qilinishicha, viloyat hokimi Xayrulla Bozorov, Sharqiy harbiy okrug qo‘shinlari qo‘mondonligi, Mudofaa va xavfsizlik tizimlari rahbarlari, viloyat sektorlari rahbarlari va jamoatchilik vakillari viloyatning shahar va tumanlarida bo‘lib, urush qatnashchilari holidan xabar olgan.
Rishtonlik Abdulhay ota Azizov Moskva ostonalarida bo‘lgan janglarda ishtirok etgan. Urushdan qaytgach, 53 yil xalq ta’limi sohasida mehnat qilgan. Abdulhay otaga prezident tabrigi, pul mukofoti va qimmatbaho sovg‘alar topshirildi.
Buvaydalik Kenjaboy ota Egamqulov viloyat hokimi va mehmonlarni ochiq chehra bilan kutib oldi. Otaxon suhbat davomida urush davrida boshidan o‘tkazgan sinovlar, qiyinchiliklar, ko‘rsatgan qahramonliklari haqida so‘zlab berdi.
Kenjaboy ota 1943-yil noyabr oyida jangovor topshiriqlarni bajarish chog‘ida chap oyog‘idan yarador bo‘lib Vatanga qaytgan. Urushdan keyin 1945-yildan 1984-yilgacha turli mas’ul lavozimlarda faoliyat olib bordi. Kenjaboy ota urushda ko‘rsatgan qahramonliklari uchun qator orden va medallar bilan taqdirlangan.
Uchko‘priklik Dehqonboy ota Qurbonov 98 yoshni qarshiladi. Minglab o‘zbekistonliklar qatori u ham qo‘liga qurol olib, dushmanga qarshi kurashgan. Urushdan keyin temiryo‘l tizimida ishlagan.
Turmush o‘rtog‘i Mo‘tabarxon aya bilan 5 qiz, 1 o‘g‘ilni tarbiyaladi. Hozirda otaxon 100 dan ziyod nabira-yu, chevara-evaralar qurshovida bugungi tinch-osoyishta va farovon o‘tayotgan har bir kun uchun shukrona aytib yashamoqda.
Tantanali tadbirlar davomida ularga ham viloyat rahbari tomonidan prezident tabrigi va bayram sovg‘alari topshirilgan.
Qayd etilishicha, ayni kunda viloyatda 28 nafar urush qatnashchisi istiqomat qiladi.
Izoh (0)