Монополияга қарши курашиш қўмитаси ва унинг ҳудудий бошқармалари томонидан режага асосан ҳудудларда электр таъминоти корхоналарининг электр энергияси учун тарифларни тўғри қўлланилгани юзасидан ўрганишлар ўтказилмоқда, деб хабар беради қўмита матбуот хизмати.
Маълум қилинишича, қўмитанинг Андижон вилояти ҳудудий бошқармаси режасига асосан 2022 йилнинг апрель ойида ўтказилган ўрганишда «Андижон ҲЕТК» АЖ томонидан вилоятдаги диний ташкилотларга, шу жумладан, масжидларга 2019—2021 йилларда электр энергияси учун белгиланган тарифлар нотўғри қўлланилгани аниқланган.
Вазирлар Маҳкамасининг «Дин соҳасидаги маънавий-маърифий, таълим ишлари ва фаолиятини янада такомиллаштиришда ижтимоий кўмак ва имтиёзлар бериш тўғрисида»ги қарори ва фармойишида Ўзбекистон ҳудудидаги диний ташкилотларга 2003 йилнинг 1 сентябридан бошлаб уларга кўрсатиладиган коммунал хизматларга (табиий газ, ичимлик суви, иссиқлик энергияси, электр энергияси, телефон, оқова сув ва маиший чиқиндиларни ташиш) тўловларни аҳоли учун белгиланган тарифлар бўйича тўланиши қайд этилган.
Шунга қарамай, ўрганиш давомида «Андижон ҲЕТК» АЖ томонидан 2019—2021 йилларда вилоятдаги 44 та диний ташкилотларга, шу жумладан, масжидларга аҳоли учун белгиланган нарх (295 сўм) қўлланилмай, улгуржи истеъмолчилар учун белгиланган нарх (450 сўм) қўлланилгани аниқланган. Бунинг натижасида масжидлардан жами 74 миллион 378 минг сўм ортиқча даромад олинганлиги аниқланган.
Таъкидланишича, бугунги кунда Монополияга қарши курашиш қўмитасининг Андижон вилояти ҳудудий бошқармаси томонидан «Андижон ҲЕТК» АЖнинг нотўғри ҳисоблаган 74 миллион 378 минг сўм маблағлар масжидларга қайта ҳисоб-китоб қилиш ишлари амалга оширилмоқда.
«Бундай ҳолатларни олдини олиш мақсадида бугунги кунда қўмитанинг ҳудудий бошқармалари томонидан ўз ҳудудларида ўрганишлар олиб борилмоқда», — дейилади хабарда.
Эслатиб ўтамиз, Ўзбекистонда 2021 йилда 100 мингдан ортиқ аҳолидан коммунал тўловлари учун ортиқча ундирилган 8 миллиард сўм қайтарилганди.
Изоҳ (0)