Украинанинг Львов шаҳрида яшовчи 14 ёшли йигит қаҳвахонада қулоқчин билан ўтиргани ва Анжелина Жолига эътибор бермаганидан кейин машҳурликка эришгани ҳақида хабар берилганди. Юлиан ҳаётидаги энг эсда қоларли воқеа ҳақидаги таассуротлари билан ўртоқлашди. Бу ҳақда Cosmopolitan нашри маълум қилди.
Голливуднинг таниқли актрисаси Украинанинг Львов шаҳрига келганида бозор ичидаги қаҳвахонага кирди. У қаҳва ичиб, круассандан татиб кўрди. Юлдузнинг иштирокидаги видеосида нафақат унинг ўзи бор эди. Балки, кўпроқ қулоқчин таққан ўсмир барчанинг эътиборини тортди. У столда ўтирар ва Голливуд юлдузи ҳамда унинг атрофидаги шов-шувларга эътибор бермай, телефонда ниманидир диққат билан ўқир эди.
Маълум бўлишича, боланинг исми Юлиан. У расм чизишга қизиқади. Энди ижтимоий тармоқда унинг саҳифасидаги суратида Анжелина билан видеодаги бир хил кадр туради. «Сен жуда банд бўлганингда», — деб изоҳлайди бола.
Саккизинчи синф ўқувчисининг сўзларига кўра, у тасодифан қаҳвахонага кирган. Бола велосипед олиб келгани бориши керак бўлган. Бироқ автобус узоқ вақт келмагач, у нимадир тановул қилишга қарор қилган.
«Улар инглиз тилида гаплашаётганини эшитдим. Қарасам, қандайдир машҳур одам, лекин дарҳол танимадим. Кейин бу Анжелина Жоли эканлигини англадим. У ҳақиқий ҳаётда фильмлардагидан ҳам гўзалроқ эди. Уйга келганимда эса онамнинг айтишича, мен аллақачон машҳурликка эришгандим. Энди мен ўзим иштирокимдаги мемларни тўплаяпман. Бунинг ҳеч қандай ёмон жойи йўқ, одамлар ижобий нарсаларни баҳам кўришсин», — деди Юлиан.
Юлиан содир бўлган ҳамма нарсани туш сифатида қабул қилди. Энди у нафақат қариндошлари ва дўстларидан кўплаб хабарлар олади, балки турли нашрларга ҳам интервью беради. «Бу шундай тасодифки, ҳеч қандай режа тузмаганман, лекин шон-шуҳратнинг ўзи мени топди», — деб ҳазиллашди Юлиан.
Интернет фойдаланувчилари «Оскар» совриндори еб тугатмаган круассанни сотиб олишни таклиф қилмоқда. Қаҳвахона фарроши уни 1 миллион гривна (34 минг доллар)га баҳолади.
Изоҳ (0)