Ханде Эрчел «Маликам энди қара», «Эшигимни қоқ» телесериали намойишидан кейин дунёга машҳур актрисага айланди. Кўпчиликни, жумладан, актрисанинг шахсий ҳаёти, севимли машғулотлари ва, албатта, Керем Бурсин билан муносабатлари қизиқтиради. «Lisa.ru» нашри бу ҳақда аксарият томошабинларга номаълум бўлган фактлар билан бўлишди.
Кичик шаҳарчада ўтган болалик
Ханде 1993 йил 24 ноябрда Бандирма шаҳрида туғилган. Актриса бу жойни жуда яхши кўради ва болалиги у ерда ўтганидан хурсанд.
«Мен Истанбулда катта бўлишни хоҳламаганман. Кичкина жойда ҳамма бир-бирини танийди, шунинг учун у ерда эркин бўлади. Биз ҳамма болалар каби кўчада нон ва томат пастасини бирга еб, маҳаллада ўсганмиз. Дадам шундай феъл-атворга эга эдики, биз тумандан ташқарига чиқа олмаганмиз», — деб эслайди Эрчел.
Истанбулга кўчиш
17 ёшида бўлажак актриса Истанбулга кўчиб ўтишга қарор қилди. У болалигидан ижодкор бўлганлиги сабабли турк санъатини ўргангани университетга ўқишга кирди.
Ҳашаматли уй
Ханде 11 йилдан бери Истанбулда яшайди. Муваффақиятли лойиҳалар туфайли у тахминан бир миллион долларлик ҳашаматли уй сотиб олишга муваффақ бўлди. Маълумки, актриса таъмирлаш учун яна юз минг доллар сарфлаган ва қурувчилар билан шартнома тузган, унга кўра улар Ханденинг уйида ўз ишлари суратларини кўрсатишга ҳақли эмас.
Севимли сингил
Ханденинг Гамзе исмли синглиси бор. Улар бир-бири билан жуда қадрдон ва актрисанинг саҳифасида Гамзе ва унинг қизи Мави билан суратлар тез-тез пайдо бўлади.
«Синглим Гамзе билан орамизда бир йил фарқ бор. Биз эгизаклардекмиз ва худди шундай тарбияланганмиз. Сочларимиз бир хил турмакланар, бир хил кийим кияр эдик. Бир неча йил ўтиб, улғайганимизда ва турли хил кийимларни кийишни бошлаганимизда, орамизда жанжаллар бўлди. Иккимизнинг ҳам шу кунларни эслатадиган чандиқларимиз бор. Гамзе ярамас эди ва барча айбни менга юкларди», — дейди кулиб актриса.
Машҳур холасига ўхшайдиган жиян
Ханденинг фикрича, Мави унга жуда ўхшайди. Актриса жиянини телбаларча яхши кўради ва бутун бўш вақтини у билан ўтказишга ҳаракат қилади. Аммо у ҳали она бўлишни режалаштирмаяпти, лекин фарзандлари ҳам ўзи каби бўлишини орзу қилади.
«Мави бизнинг оиламиз учун ҳақиқий совғадир. Бу ҳақиқатан ҳам дунёдаги ҳеч нарсага ўхшамайдиган туйғу. Мен ҳар доим оилам ҳақида кўп ўйлардим, лекин Мавининг дунёга келиши мени синглимга янада яқинлаштирди. Оналик унга жуда ярашади. Менимча, ҳали вақтим бор. Менда ҳали бундай режалар йўқ», — дея таъкидлайди актриса.
Гўзаллик танлови иштирокчиси
19 ёшида Эрчел актрисалик карьерасини қуриш учун университетни тарк этишга қарор қилди. Шундай қилиб биринчи навбатда у Озарбайжонда ўтказилган гўзаллик танловида иштирок этди. У ерда бўлажак юлдуз иккинчи ўринни эгаллади.
90 та кастинг
Ханде дарҳол кино оламига киришга муваффақ бўлмади. У «Чолиқуши» романининг янги версиясида кичик ролга рухсат берилгунга қадар 90 га яқин кастингларда қатнашди. Актрисанинг дебюти 2013 йилда бўлиб ўтди, аммо у асосий ролга тасдиқланиши учун яна уч йил кутишга тўғри келди.
Кино учун қурбонликлар
Маълум бўлишича, кўплаб режиссёрлар уни жуда тўлача деб ҳисоблаганлари учун у билан ҳамкорлик қилишни хоҳламаган. Кейин Ханде ҳаракат қилди ва вазн йўқотишни бошлади: у тўғри овқатланди ва мураббий назоратида спорт билан шуғулланди. Бугунги кунда актриса ўзининг қоматини бир хилда ушлаб туриш учун тинимсиз ҳаракат қилади.
Биринчи бош рол
2016 йилда «Гунеш қизлари» сериалининг премьераси бўлиб ўтди, унда Эрчел келишган ва бой йигитни севиб қолган ёш қизни ўйнади. Ёшларнинг севгисига ота-оналарнинг оилавий сирлари тўсқинлик қилади, улар ҳам фарзандларининг муносабатларига қарши.
Ушбу турк драмаси актрисага шон-шарафнинг биринчи қисмини олиб келди. Шундан сўнг «Маликам энди қара», «Қора марварид», «Ҳалқа», «Азиза» ва бошқа муваффақиятли лойиҳаларда иштирок этди.
Шартнома шартлари
2016 йилда Ханде турк кинематографиясида ўсиб бораётган юлдуз сифатида эътироф этилганида, унга L’Oreal компанияси ҳамкорликда ишлашни таклиф қилган. Қизиғи шундаки, шартнома шартларига кўра, актрисага бир йил давомида сочини бўяш тақиқланган.
Онанинг касаллиги
Ханде онасини жуда яхши кўради, афсуски, у 2019 йилда ундан айрилди. Актрисанинг онаси саратон касаллиги билан курашди, аммо касалликка дош бера олмади.
«5 октябрь — бир йил олдинги бу кунни эслайман. Мен тиззангизда ётибман, сиз сочларимни силайсиз. Сизнинг қизингиз бўлиш мен учун катта мукофот. Сиз қанчалик гўзалсиз, онам ... бу дунёда бўлганингиз учун сиздан миннатдорман ... », — деб ёзганди актриса ўзининг саҳифасида.
Бугунги кунда у «Саратонсиз ҳаёт»нинг элчиси бўлиб, унинг оиласи билан бир хил муаммоларга дуч келган одамларга ва уларнинг оилаларига ёрдам беришга ҳаракат қилади.
Эда Йилдиз роли
2020 йилда Эрчелга уни бутун дунёга машҳур қилган лойиҳада иштирок этиш таклиф қилинди. «Эшигимни қоқ» телесериалида у ландшафт дизайнери бўлишни орзу қилган қиз сифатида қайта туғилди.
Аммо Эда грантини олиб қўйган ёш тадбиркор Серкан Болат туфайли университетдаги ўқишини ташлаб кетишга мажбур бўлади. Қизиғи шундаки, шахсан учрашгач, ёшлар бир-бирларини севиб қолишади.
«Сценарийни ўқиганимда Эда мени жуда хурсанд қилди. Унинг ҳаётий энергияси ниҳоятда юқори. Ҳаётга ижобий қарайдиган аёл бўлиш, нима истаётганини билиш ва шу мақсад сари интилиш, ўзида куч топиш, ўжарлик, қатъийлик — Эдадан ўрганмоқчи бўлган кўп жиҳатлар бор. Мен актрисаликни, суратга тушишни яхши кўраман. Бу жуда қадрли. Биз бу лойиҳа устида ақл бовар қилмайдиган жамоа билан ишладик», — дейди Эрчел.
Керем Бурсин билан муносабат
«Эшигимни қоқ» сериали чиққандан сўнг кўплаб мухлислар асосий ролларнинг ижрочилари ҳақиқий ҳаётда учрашишларини пайқаб қолди. Кейинчалик уларнинг тахминларини актёрларнинг ўзлари тасдиқлади, улар биргаликда чиқишни бошлади ва орадаги ҳис-туйғуларини яширмади.
Бироқ, 2022 йил баҳорининг бошида жуфтлик ажрашди, деган миш-мишлар пайдо бўлди — Керем Бурсиннинг вакиллари ҳам бунга ишора қилишди. Хандега келсак, у саҳифасидан Керем билан бирга тушган барча суратларни ўчириб ташлади ва уни кузатишни тўхтатди. Бироқ, шу пайтгача актриса уларнинг ажралиши ҳақида ҳеч қандай изоҳ бермаган.
Севги бу…
«Мен учун муҳаббат ақлдан озишдир. Менинг энг даҳшатли ва энг жонли ҳолатларим ошиқлигимда намоён бўлади. Бу ҳам энг яхши, ҳам айни пайтда энг қийин саҳифа», — дейди Ханде.
Хобби
Эрчел расм чизишни яхши кўради ва бир кун келиб бўш вақтларида ижод қилиш, кейин эса ўз ишини бошқаларга кўрсатиш учун расм устахонаси очишни орзу қилади.
Севимли уй ҳайвони
Ханденинг яхши кўрадиган иккита ити бор, бироқ актриса сўнгги пайтларда улар билан кўп вақт ўтказмаяпти.
«Мен бандлигим туфайли улар билан вақт ўтказа олмайман, лекин имкон бўлганда ҳаммамиз боғда сайр қиламиз», — дейди Эрчел.
Орзулар рўёби
«Мен доим шу кунлар келишини орзу қилардим. Агар ният қилмасангиз, у амалга ошмайди. Хавотирга тушган, қўрқиб кетган пайтларим ҳам бўлган. Мен учун жуда қийин бўлган дам ҳам тушди бошимга, лекин бирор нарсани хоҳласангиз, йўлингизга нима тўсқинлик қилмасин, уни рад эта олмайсиз. Сиз орзуга эришгунингизча йўлда давом этасиз», — дейди Ханде Эрчел.
Изоҳ (0)