Россия нефтидан воз кечиш, телеканалларини тақиқлаш ва «Сбербанк»ни SWIFT’дан узиш — Еврокомиссия янги санкциялар пакетини эълон қилди

Европа Комиссияси раҳбари Урсула фон дер Ляйен Россияга қарши янги санкциялар пакетини эълон қилди.

Пакет доирасида Европа Иттифоқи Россия нефтининг импортига тақиқ қўяди, «Сбербанк» ва яна икки йирик Россия банки SWIFT’дан узилади.

Бундан ташқари, Европа Иттифоқи ҳудудида Россиянинг учта йирик телеканалини трансляция қилиш тақиқланади (фон дер Ляйен айнан қайси каналлар эканига аниқлик киритмаган).

Еврокомиссия раҳбари, шунингдек, янги шахсий санкцияларни ҳам эълон қилди, хусусан, ЕИ маълумотларига кўра, Бучада тинч аҳолининг ўлдирилишида иштирок этган юқори мартабали зобитлар «қора рўйхат»га киритилган.

AFP ҳужжат лойиҳасига таяниб, рус православ черковининг епископи патриарх Кириллга ҳам шахсий санкциялар қўлланилиши ҳақида хабар бермоқда.

Европа Иттифоқининг янги санкциялари Украинада уруш бошланганидан бери жорий қилинган олтинчи санкциялар пакети бўлади. Санкциялар кучга кириши учун улар Европа Иттифоқининг барча 27 давлати элчилари томонидан тасдиқланиши керак. BBC маълумотларига кўра, бу бир неча кунга чўзилиши ҳам мумкин.