УЕФА Россия терма жамоалари ва клубларини Еврокубок мусобақаларидан четлатди.
Ташкилот Россия терма жамоаси ва клубларининг мақоми, шунингдек, уларнинг ташкилот тасарруфидаги мусобақаларида иштирок этиш масаласини кўриб чиқишни режалаштираётгани хабар қилинганди.
Унга кўра, RPL жамоалари 2022/23 йилги мавсум Чемпионлар Лигаси, Европа Лигаси ва Конференциялар Лигасида иштирок этмайди. Бу аёллар ўртасидаги Чемпионлар Лигаси ва УЕФА ёшлар лигасига ҳам тегишли.
Шунингдек, янги мавсумда Россия мини-футбол клублари ҳам УЕФА тасарруфидаги мусобақаларда иштирок эта олмайди.
Россия терма жамоаси Миллатлар Лигасидан четлатилди. Терма жамоа автоматик тарзда Б лиганинг 2-гуруҳида охирги ўринга тушириб юборилади.
Россия аёллар терма жамоаси эса Евро—2022 ни ўтказиб юборади (унинг ўрнини Португалия эгаллайди) ва ЖЧ—2023 саралаш босқичида қатнашмайди. Аввалги натижалар бекор қилинади.
Россия ёшлар терма жамоаси Евро—2023 саралаш босқичида иштирок этишдан четлатилди.
Эслатиб ўтамиз, 28 февраль куни ФИФА ва УЕФА Украинадаги вазият туфайли Россия терма жамоалари ва Россия клубларини барча халқаро мусобақаларда иштирок этишдан четлатди. Россия терма жамоаси эса халқаро мусобақалардан четлатилгани муносабати билан унинг ўрнига Польша ЖЧ—2022 саралаши плей-оффининг финалида ўйнаши хабар қилинганди.
Изоҳ (0)