Андижонда хизмат вазифасини бажариш учун борган Мажбурий ижро бюроси ходими калтакланди. Бу ҳақда Zo‘r TV телеканалининг «Бу кун» информацион дастурида маълум қилинди.
Маълум қилинишича, «Агробанк» Олтинкўл филиали томонидан «Зарин-савдо» МЧЖга чеварчиликда ишлатиладиган хом ашёни сотиб олиш учун 60 миллион сўм кредит ажратилган. Бироқ фирма кредит маблағларини ўз вақтида тўламай келган ва гаровга қўйилган Damas автомобилини зўравонлик йўли билан олиб чиқиб кетган.
«Қонун барчага бараварлиги тушунтирилганига қарамай, аёл МИБ ходимига фаол қаршилик кўрсатган. Гаровда бўлган автотранспорт воситасини олиб қочиб, номаълум томонга яширган», — дейилади хабарда.
Бу ҳолатдан ўзига тўғри хулоса чиқармаган аёл бюронинг Олтинкўл тумани бўлими келиб, ходимнинг хизмат хонасида ҳам тартибсизлик келтириб чиқарган.
Ҳозирда ҳолат юзасидан туман прокуратураси томонидан терговга қадар текширув ҳаракатлари ўтказилмоқда.
Бундан олдин, Қашқадарёда банк ходимлари мижозлар томонидан калтаклангани, Жиззахда қарийб 300 миллион сўм қарзини тўламай келган фуқаро МИБ ходимларини дўппослагани тўғрисида хабар берилганди.
Изоҳ (0)