Andijonda xizmat vazifasini bajarish uchun borgan Majburiy ijro byurosi xodimi kaltaklandi. Bu haqda Zo‘r TV telekanalining “Bu kun” informatsion dasturida ma’lum qilindi.
Ma’lum qilinishicha, “Agrobank” Oltinko‘l filiali tomonidan “Zarin-savdo” MCHJga chevarchilikda ishlatiladigan xomashyoni sotib olish uchun 60 million so‘m kredit ajratilgan. Biroq firma kredit mablag‘larini o‘z vaqtida to‘lamay kelgan va garovga qo‘yilgan Damas avtomobilini zo‘ravonlik yo‘li bilan olib chiqib ketgan.
“Qonun barchaga baravarligi tushuntirilganiga qaramay, ayol MIB xodimiga faol qarshilik ko‘rsatgan. Garovda bo‘lgan avtotransport vositasini olib qochib, noma’lum tomonga yashirgan”, — deyiladi xabarda.
Bu holatdan o‘ziga to‘g‘ri xulosa chiqarmagan ayol byuroning Oltinko‘l tumani bo‘limi kelib, xodimning xizmat xonasida ham tartibsizlik keltirib chiqargan.
Hozirda holat yuzasidan tuman prokuraturasi tomonidan tergovga qadar tekshiruv harakatlari o‘tkazilmoqda.
Bundan oldin, Qashqadaryoda bank xodimlari mijozlar tomonidan kaltaklangani, Jizzaxda qariyb 300 million so‘m qarzini to‘lamay kelgan fuqaro MIB xodimlarini do‘pposlagani to‘g‘risida xabar berilgandi.
Izoh (0)