Тошкент вилоятида Тожикистондан кириб келган юк поезди остида яширилган салкам 2 кило наркотик топилди. Бу ҳақда ДХХ матбуот хизмати хабар берди.
Маълум қилинишича, Тошкент вилояти Бекобод тумани «Бекобод-темир йўл» халқаро ўтказиш пунктига Хўжанд—Арис йўналишида Тожикистондан кириб келган юк поезди ҳамда унинг таркибида бўлган вагонлар белгиланган тартибда ДХХ чегара қўшинлари ҳарбий хизматчилари ҳамда Давлат божхона қўмитаси ходимлари ҳамкорлигида хизмат итлари ёрдамида кўздан кечирилган.
Текширув давомида қурилиш молларини ташишга мўлжалланган вагонлардан бирининг жуфт ғилдиракларини улаб турувчи таянч асосининг ғовагида қора рангли полиэтилен пакет борлиги аниқланган. Пакет холислар ва мутахассислар иштирокида очиб кўрилганда, унинг ичидаги икки ўрамда 1 килограмм 949 грамм опий гиёҳвандлик воситаси бўлган.
Ҳозирда мазкур ҳолат юзасидан Жиноят кодексининг 246-моддаси 2-қисми (гиёвандлик воситаларини кўп миқдорда контрабанда қилиш) билан жиноят иши қўзғатилган.
Мавзуга доир:
- Тошкент вилоятида Тожикистондаги наркокурьер юборган 9 килодан ортиқ гиёҳванд моддани сотиб бермоқчи бўлган шахслар ушланди
- Афғонистондан Ўзбекистон орқали гиёҳванд моддаларни олиб ўтишга уринишлар ортгани маълум қилинди
- «Ярим тонна наркотик моддалар, 1 млн доллар нақд хорижий валюта тўхтатиб қолинди» – Божхона қўмитаси
Изоҳ (0)