ЮНЕСКО муҳофазасидаги Ичан-қалъа тарихий ёдгорлик мажмуидаги 33 та тарихий обидага термитлар жиддий зарар етказаётгани хабар берилганди. Маданий мерос агентлиги бу хавфнинг олдини олиш етказиладиган зарарларни бартараф этиш мақсадида мутахассис-экспертлардан иборат ишчи гуруҳ ташкил этилганини маълум қилди.
Қайд этилишича, «Ичан-қалъа» давлат музей қўриқхонаси ҳудудида 58 та тарихий-меъморий обидалар бўлиб, уларни зараркунандалардан асраш бўйича Хоразм Маъмун академияси ва Маданий мерос агентлиги вилоят бошқармаси ҳамкорликда узоқ йиллар давомида илмий-амалий тадбирлар олиб бормоқда.
«Хусусан, Хоразм Маъмун академияси махсус лаборатория илмий ходимлари томонидан бундан 10 йил олдин 34 та термит билан зарарланган обида аниқланиб, бу хавфнинг олдини олиш бўйича дезинфекция тадбирлари амалга ошириб келинмоқда.
2019 йилда ҳам Қутлуғ Мурод иноқ, Жума мачит каби обидаларда дезинфекция ишлари бажарилиб, доимий назоратга олинган. Кейинги ўн йил давомида термитдан зарарланган обидалар сони ошгани йўқ. Демак, доимий профилактика тадбирлари ўз натижасини бермоқда.Меъморий обидаларни асраб-авайлаш, зарарланишининг олдини олиш бўйича назорат ишлари бундан кейин ҳам изчил давом эттирилади», — дейилади агентлик хабарида.
Агентлик маълумотига кўра, Марказий Осиё мамлакатлари ҳудудларида термитларнинг 4 тури учрайди. Ўзбекистонда термитларга қарши кураш чоралари ХХ асрнинг ўрталаридан бошлаб ишлаб чиқила бошланди. 2000 йил бошларида термитларга қарши комплекс чора-тадбирларини амалга ошириш, шу жумладан зараркунандага қарши экологик зарарсизроқ препаратлардан фойдаланиш масалалари ҳам кўтарила бошланди.
Фанлар академияси Зоология институти ҳузуридаги Республика термитларга қарши курашиш маркази ва Хоразм Маъмун академияси томонидан «Ичан-Қалъа давлат музей қўриқхонаси» тасарруфидаги тарихий обидаларда термитлар тарқалишининг олдини олиш ва уларга қарши курашишнинг кимёвий ва биологик усуллари бўйича тажриба олиб борилиб, термитларнинг зарарли фаолияти назоратга олинган.
Ҳудудларда термитларга қарши курашиш ва улар томонидан етказиладиган зарарларни бартараф этиш мақсадида Ўзбекистон Республикаси Фавқулодда вазиятлар, Молия, Қишлоқ хўжалиги, Маданият, Туризм ва маданий мерос вазирликлари, Маданий мерос агентлиги, Фанлар академияси Зоология институти, Хоразм Маъмун академияси вакиллари ҳамда мутахассис-экспертлардан иборат ишчи гуруҳ ташкил этилган.
Изоҳ (0)