Қадрдон кроссовка ва чойнак: саховатли халқ совғасини асраб келаётган сардобаликлар

Сардобаликлар Сардоба фожиасидан сўнг салкам ярим йил давомида уйсизликдан сарсон-саргардон бўлди. Кимдир давлат ажратган бошпаналарда истиқомат қилган бўлса, яна кимдир қариндошиникида яшади. Бошқа биров эса ижарага уй олиб, оилавий бегона жойларда яшашга мажбур бўлди. Ана шундай пайтда сардобаликларга бутун ўзбекистонликлар хайрия ёрдамларини юборди. Қашқадарё ва сурхондарёликлар озиқ-овқат юборган бўлса, водий халқи уларга рўзғорбоп буюмлар олиб борди. Хоразм ва қорақалпоғистонликлар кўрпа-ёстиқ улашган бўлса, Самарқанд ва жиззахликлар ҳам қараб турмади.

Қувонарлиси сардобаликлар саховатли халқ юборган буюмларни, ҳатто кийим-кечакларни ҳали-ҳамон авайлаб, улардан фойдаланиб келмоқда.

«Ўша пайтда биз сардобаликларга юртимизнинг барча вилоятларидан хайрия ёрдамлари кела бошлаганди. Кимдир идиш товоқ юборса, яна кимдир кўрпа-тўшак, яна кимдир эса кийим-кечак юборарди. Мен ва болаларим қайнонам билан бирга Гулистон шаҳридаги кўп қаватли уйлардан хонадон ижарага олиб ўша ёқда яшагандик. Бир куни кўз касалликлари шифохонасига борсам сардобалик эканимни билишгач, кўзим учун текинга кўзойнак беришган. Кейин сардобаликлар учун рўзғор буюмлари олиб келинганини, барчага текин тарқатилаётганини ҳам айтишган. Айтилган манзилга борсам, менга чой қайнатиш учун газ плитага мослаб алоҳида, электр токига мослаб алоҳида электрочойнак беришган. Бу чойнакларни ҳалигача ишлатаман. Булар мен учун жудаям қадрли буюмлар, саховатли халқимиздан қолган совға», — дейди Марғуба Шодиева.

«Дарё» мухбири билан суҳбатда бўлган сирдарёлик Бахтиёр ака ҳам ўша пайтда ўнлаб кийим-кечак олганини айтмоқда.

«Ўша пайтда халқимиздан жуда катта ёрдамлар келган. Қўша-қўша кийим-кечак, оёқ кийимлар берилган. Масалан ўғлингиз учун кийим-кечак ва оёқ кийим олмоқчи бўлсангиз ёшини айтардингиз, янги кийим-кечак ва оёқ кийим беришарди. Шахсан мен ўша пайтда берилган футболка ва кроссовкадан ҳалигача фойдаланиб келаман. Ва халқимизнинг бу ёрдамини ҳеч қачон ёдимдан чиқармайман», — дейди Бахтиёр ака.

Сардобаликларни қувонтирган яна бир жиҳат улар учун янги шаҳарча барпо этилди. Одамларга шинам ва қулай уйлар қуриб берилди.

Президент Шавкат Мирзиёев тамал тошини қўйиб берган 37 та 1480 та хонадондан иборат кўп қаватли уйлар қурилиши 2020 йил 15 май куни бошланиб, 2020 йилнинг 15 октябрь куни тантанали равишда топширилди.

Маълум бўлишича, Сардоба тўғони бузилиши тумандаги учта маҳалла — «Қўрғонтепа», «Дўстлик» ва «Юртдош» маҳаллаларидаги хонадонларга зарар етказган.

Туман ҳокими Абдуазим Хидировнинг айтишича, шу маҳаллаларда ўша пайтда 2700 га яқин хонадон мавжуд бўлиб, унда 12 минг 872 нафар аҳоли истиқомат қилган.

Ҳудуддаги учта маҳаллада 1980 йилларда қурилган 530 та бетон қопламали уйлар мавжуд бўлган бўлиб, тошқиндан фақат улар омон қолган. Аммо тошқиндан сўнг таъмирлаб чиқилган.