Qadrdon krossovka va choynak: saxovatli xalq sovg‘asini asrab kelayotgan sardobaliklar

Sardobaliklar Sardoba fojiasidan so‘ng salkam yarim yil davomida uysizlikdan sarson-sargardon bo‘ldi. Kimdir davlat ajratgan boshpanalarda istiqomat qilgan bo‘lsa, yana kimdir qarindoshinikida yashadi. Boshqa birov esa ijaraga uy olib, oilaviy begona joylarda yashashga majbur bo‘ldi. Ana shunday paytda sardobaliklarga butun o‘zbekistonliklar xayriya yordamlarini yubordi. Qashqadaryo va surxondaryoliklar oziq-ovqat yuborgan bo‘lsa, vodiy xalqi ularga ro‘zg‘orbop buyumlar olib bordi. Xorazm va qoraqalpog‘istonliklar ko‘rpa-yostiq ulashgan bo‘lsa, Samarqand va jizzaxliklar ham qarab turmadi.

Quvonarlisi sardobaliklar saxovatli xalq yuborgan buyumlarni, hatto kiyim-kechaklarni hali-hamon avaylab, ulardan foydalanib kelmoqda.

“O‘sha paytda biz sardobaliklarga yurtimizning barcha viloyatlaridan xayriya yordamlari kela boshlagandi. Kimdir idish tovoq yuborsa, yana kimdir ko‘rpa-to‘shak, yana kimdir esa kiyim-kechak yuborardi. Men va bolalarim qaynonam bilan birga Guliston shahridagi ko‘p qavatli uylardan xonadon ijaraga olib o‘sha yoqda yashagandik. Bir kuni ko‘z kasalliklari shifoxonasiga borsam sardobalik ekanimni bilishgach, ko‘zim uchun tekinga ko‘zoynak berishgan. Keyin sardobaliklar uchun ro‘zg‘or buyumlari olib kelinganini, barchaga tekin tarqatilayotganini ham aytishgan. Aytilgan manzilga borsam, menga choy qaynatish uchun gaz plitaga moslab alohida, elektr tokiga moslab alohida elektrochoynak berishgan. Bu choynaklarni haligacha ishlataman. Bular men uchun judayam qadrli buyumlar, saxovatli xalqimizdan qolgan sovg‘a”, — deydi Marg‘uba Shodiyeva.

“Daryo” muxbiri bilan suhbatda bo‘lgan sirdaryolik Baxtiyor aka ham o‘sha paytda o‘nlab kiyim-kechak olganini aytmoqda.

“O‘sha paytda xalqimizdan juda katta yordamlar kelgan. Qo‘sha-qo‘sha kiyim-kechak, oyoq kiyimlar berilgan. Masalan o‘g‘lingiz uchun kiyim-kechak va oyoq kiyim olmoqchi bo‘lsangiz yoshini aytardingiz, yangi kiyim-kechak va oyoq kiyim berishardi. Shaxsan men o‘sha paytda berilgan futbolka va krossovkadan haligacha foydalanib kelaman. Va xalqimizning bu yordamini hech qachon yodimdan chiqarmayman”, — deydi Baxtiyor aka.

Sardobaliklarni quvontirgan yana bir jihat ular uchun yangi shaharcha barpo etildi. Odamlarga shinam va qulay uylar qurib berildi.

Prezident Shavkat Mirziyoyev tamal toshini qo‘yib bergan 37 ta 1480 ta xonadondan iborat ko‘p qavatli uylar qurilishi 2020-yil 15-may kuni boshlanib, 2020-yilning 15-oktabr kuni tantanali ravishda topshirildi.

Ma’lum bo‘lishicha, Sardoba to‘g‘oni buzilishi tumandagi uchta mahalla — “Qo‘rg‘ontepa”, “Do‘stlik” va “Yurtdosh” mahallalaridagi xonadonlarga zarar yetkazgan.

Tuman hokimi Abduazim Xidirovning aytishicha, shu mahallalarda o‘sha paytda 2700 ga yaqin xonadon mavjud bo‘lib, unda 12 ming 872 nafar aholi istiqomat qilgan.

Hududdagi uchta mahallada 1980-yillarda qurilgan 530 ta beton qoplamali uylar mavjud bo‘lgan bo‘lib, toshqindan faqat ular omon qolgan. Ammo toshqindan so‘ng ta’mirlab chiqilgan.