Самарқандда банк раҳбари 6 минг доллар пора билан қўлга тушди

Самарқанд шаҳрида кредит ажратиш учун пора талаб қилган «Микрокредитбанк» раҳбари қўлга олинди. Бу ҳақда вилоят Ички ишлар бошқармаси хабар қилди.

Қайд этилишича, ҳуқуқни муҳофаза қилувчи органлари томонидан Самарқанд шаҳрида тезкор тадбир ўтказилган. Унда «Микрокредитбанк» Самарқанд филиали раҳбари Б.Ҳ. (1982 йилда туғилган) МЧЖга 2 миллиард сўм кредит ажратиб беришни ваъда қилгани аниқланган. У хизмати эвазига тадбиркордан 10 минг доллар миқдорида пора талаб қилиб, олдиндан 4 минг доллар олган. Тадбир давомида банк раҳбари қолган 6 минг доллари миқдоридаги пулларни олаётган вақтида ашёвий далиллар билан ушланган.

Ҳолат юзасидан мансабдорга нисбатан Жиноят кодексининг тегишли моддалари билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Самарқандда 1,5 млрд сўм кредит маблағини ўзлаштирган жамият раҳбарига жиноят иши қўзғатилганди. Шунингдек, Тошкентда тадбиркорга 2 млн доллар имтиёзли кредит олиб беришни ваъда қилган шахслар ушлангани, Наманганда фуқарога фермер хўжалиги ерини ажратиб бериш учун 15 минг доллар сўраган ҳоким ёрдамчиси ва унинг шериклари қўлга олингани хабар қилинган.