«Уфа» Остон Ўруновни «Спартак»дан сотиб олмаслиги мумкин

Остон Ўрунов «Уфа» билан ижара шартномаси якунига етгач, «Спартак»ка қайтиши мумкин.

Ижара шартномаси тузилишидан олдин клублар «Уфа» ўзбекистонлик ярим ҳимоячини сотиб олиши борасида оғзаки келишиб олган эди. Бироқ айни дамда «Уфа» раҳбарияти ушбу трансферни амалга оширишни режалаштирмаяпти, дея хабар беради Metaratings.

Аввалроқ уфаликлар бош мураббийи Алексей Стукалов ўз ўйини билан ҳайратга солмаётган футболчини сотиб олиш зарурлигига шубҳа қилаётгани хабар қилинганди.

Қолаверса, «Спартак»нинг жамоа собиқ директори ва ҳозирда шу лавозимда «Уфа»да фаолият олиб бораётган Шамил Газизов билан суд жараёни ҳам келишувга халал бераётгани тахмин қилинмоқда. Москваликлар Ўруновнинг «Спартак»ка ўтишига бош бўлган Газизовдан 88 миллион рублни қайтаришни талаб қилмоқда.

Агар 21 ёшли футболчи «Спартак»ка қайтадиган бўлса, Москва клуби уни сотишга ҳаракат қилади.

Остон умумий ҳисобда 2021/22 йилги мавсум «Уфа» сафида Россия чемпионати доирасида 12 та ўйин ўтказган.