«Манчестер Юнайтед» устози Ралф Рангник мавсум сўнгида Австрия терма жамоаси бош мураббийига айланди. Бу ҳақида Австрия футбол федерацияси матбуот хизмати маълум қилди.
63 ёшли мутахассис «Манчестер Юнайтед» билан мавсумни якунлайди ва май ойининг охирида Австрия терма жамоасини Миллатлар Лигасидаги ўйинларга тайёрлашга киришади.
Австрияликлар Рангник билан 2 йиллик шартнома имзолади. Агарда терма жамоа Евро—2024 га чиқадиган бўлса, битим автоматик равишда 2026 йилгача узайтирилади.
Хабарларга кўра, Рангник Автрия термасини бошқариш билан бирга «Манчестер Юнайтед»даги ишини ҳам давом эттириши мумкин. Чунки манкунианликлар жамоасида маслаҳатчи сифатида ойига 6 кун фаолият олиб борса бўлади.
63 ёшли мураббий 2021 йилнинг ноябрь ойида «Манчестер Юнайтед» бош мураббийига айланган эди. Мутахассис мавсум сўнгига қадар жамоани бошқариши, 2022 йил ёзидан бошлаб икки йил давомида жамоа маслаҳатчиси лавозимида фаолият юритиши келишиб олинганди.
21 апрель куни манкунианликлар «Аякс» устози Эрик тен Ҳаг билан шартнома имзолаганини маълум қилди. Нидерландиялик мураббий мавсум якунлангандан кейин Манчестер жамоасида фаолиятини бошлайди.
Немис мутахассиси қўл остида «қизил иблислар» АПЛда 55 очко жамғарган ҳолда 6-ўринда бормоқда.
Изоҳ (0)