28 апрель куни Ўзбекистон бош вазири ўринбосари — инвестиция ва ташқи савдо вазири Сардор Умурзоқов ҳамда Россия ташқи ишлар вазири Сергей Лавров ўртасида телефон орқали мулоқот бўлиб ўтди. Бу ҳақда Россия ТИВ матбуот хизмати хабар берди.
Суҳбат давомида Ўзбекистон президенти Шавкат Мирзиёевнинг 2021 йил 19 ноябрда Москвага ташрифи давомида эришилган келишувларнинг амалга ошириш юзасидан фикр алмашилган.
Шунингдек, томонлар сиёсий, иқтисодий ва гуманитар соҳалардаги икки томонлама муносабатларнинг истиқболларини, Россия ва Ўзбекистоннинг МДҲ, ШҲТ ва умуман, ташқи сиёсат йўналишидаги ўзаро ҳамкорлигини янада ривожлантириш масалаларини муҳокама қилган.
Эслатиб ўтамиз, 29 март куни Ташқи ишлар вазирлиги матбуот хизмати Абдулазиз Комилов даволаниш учун хорижга жўнаб кетганини маълум қилганди. Хабарда вазир бунгача 10 кун давомида Тиббиёт бош бошқармасининг 1-сон Марказий клиник шифохонасида тиббий муолажалар олгани айтилган.
27 апрель куни Ўзбекистон президентининг тегишли фармонлари билан Ўзбекистон ташқи ишлар вазири лавозимини эгаллаб келган Абдулазиз Комилов Ўзбекистон президенти ҳузуридаги Хавфсизлик кенгаши котибининг ташқи сиёсат ва хавфсизлик масалалари бўйича ўринбосари лавозимига тайинланди. Шунингдек, Владимир Норов Ўзбекистон ташқи ишлар вазирининг биринчи ўринбосари лавозимига тайинланган, унинг зиммасига Ўзбекистон ташқи ишлар вазири вазифасини бажариш юклатилган.
Изоҳ (0)