28-aprel kuni O‘zbekiston bosh vaziri o‘rinbosari — investitsiya va tashqi savdo vaziri Sardor Umurzoqov hamda Rossiya tashqi ishlar vaziri Sergey Lavrov o‘rtasida telefon orqali muloqot bo‘lib o‘tdi. Bu haqda Rossiya TIV matbuot xizmati xabar berdi.
Suhbat davomida O‘zbekiston prezidenti Shavkat Mirziyoyevning 2021-yil 19-noyabrda Moskvaga tashrifi davomida erishilgan kelishuvlarning amalga oshirish yuzasidan fikr almashilgan.
Shuningdek, tomonlar siyosiy, iqtisodiy va gumanitar sohalardagi ikki tomonlama munosabatlarning istiqbollarini, Rossiya va O‘zbekistonning MDH, ShHT va umuman, tashqi siyosat yo‘nalishidagi o‘zaro hamkorligini yanada rivojlantirish masalalarini muhokama qilgan.
Eslatib o‘tamiz, 29-mart kuni Tashqi ishlar vazirligi matbuot xizmati Abdulaziz Komilov davolanish uchun xorijga jo‘nab ketganini ma’lum qilgandi. Xabarda vazir bungacha 10 kun davomida Tibbiyot bosh boshqarmasining 1-son Markaziy klinik shifoxonasida tibbiy muolajalar olgani aytilgan.
27-aprel kuni O‘zbekiston prezidentining tegishli farmonlari bilan O‘zbekiston tashqi ishlar vaziri lavozimini egallab kelgan Abdulaziz Komilov O‘zbekiston prezidenti huzuridagi Xavfsizlik kengashi kotibining tashqi siyosat va xavfsizlik masalalari bo‘yicha o‘rinbosari lavozimiga tayinlandi. Shuningdek, Vladimir Norov O‘zbekiston tashqi ishlar vazirining birinchi o‘rinbosari lavozimiga tayinlangan, uning zimmasiga O‘zbekiston tashqi ishlar vaziri vazifasini bajarish yuklatilgan.
Mavzuga doir:
Izoh (0)