Ўзбекистонда фуқароларга айрим ёввойи йиртқич ва заҳарли ҳайвонларни сақлаш тақиқланиши мумкин

Экология ва атроф-муҳитни муҳофаза қилиш давлат қўмитаси «Ёввойи ҳайвонларни сақлаш ва улардан фойдаланиш тартибини янада такомиллаштириш бўйича қўшимча чора-тадбирлар тўғрисида»ги Вазирлар Маҳкамаси қарори лойиҳасини муҳокамага қўйди.

Ҳужжат лойиҳасига кўра, Ўзбекистоннинг қонунчилик ҳужжатларига мувофиқ:

• оммавий тадбирга ҳайвонлар билан келиш (оммавий тадбир дастурига мувофиқ улардан фойдаланиш бундан мустасно) тақиқланади;
• ёввойи ҳайвонларни (беданадан ташқари) умумий мулк ҳисобланган кўп квартирали уйлар зинапоя майдончалари, чердаклари, ертўлалари, даҳлизлари, шунингдек, умумий овқатланиш ва савдо жойларида сақлаш тақиқланади;
• ёввойи ҳайвонлар эгалари зиммасига ушбу ҳайвонларнинг нотинчлик келтириб чиқармайдиган ва атрофдагиларга хавф туғдирмайдиган хатти-ҳаракатини таъминлаш, фуқароларнинг ҳаёти, соғлиғи ва мулкига зарар етказилишининг олдини олиш мажбурияти юклатилади.

2022 йил 1 июлдан эътиборан Экология ва атроф-муҳитни муҳофаза қилиш давлат қўмитаси томонидан тасдиқланган рўйхатга мувофиқ ёввойи йиртқич ва заҳарли ҳайвонларни сақлаш ҳамда фойдаланиш тақиқланади.

Бунда:

• ушбу банднинг биринчи хатбошисида назарда тутилган чекловлар ёввойи йиртқич ва заҳарли ҳайвонларни рўйхатдан ўтган ҳайвонот боғлари, террариумлар, цирклар, океанарийлар, дельфинарийлар ва табиий питомниклар, шунингдек, илмий ва ўқув мақсадлари учун илмий ва таълим ташкилотлари томонидан сақлаш ва фойдаланишга нисбатан татбиқ этилмайди;
• сақланиши ва фойдаланиши тақиқланмаган ёввойи ҳайвонларни сақлаш жисмоний ва юридик шахслар томонидан рухсатномаларсиз уларни сақлаш талабларига риоя этган ҳолда, шунингдек, Экология ва атроф-муҳитни муҳофаза қилиш давлат қўмитаси томонидан белгиланган ҳолларда ёввойи ҳайвонларни сақлаш ва урчитиш бўйича питомник, шунингдек, зоология коллекциялари ҳисобга қўйилганлиги тўғрисидаги гувоҳнома асосида амалга оширилади.

Экология ва атроф-муҳитни муҳофаза қилиш давлат қўмитаси бир ой муддатда қуйидагиларни назарда тутувчи қонун лойиҳасини белгиланган тартибда Вазирлар Маҳкамасига киритади:

• «Ҳайвонот дунёсини муҳофаза қилиш ва ундан фойдаланиш тўғрисида»ги қонунга жисмоний шахслар томонидан ёввойи йиртқич ва заҳарли ҳайвонларни сақлаш ҳамда фойдаланишни тақиқлаш;
• «Лицензиялаш, рухсат бериш ва хабардор қилиш тартиб-таомиллари тўғрисида»ги қонунига ёввойи ҳайвонларни урчитиш, такрор кўпайтириш, илмий тадқиқотлар ўтказиш, таълим, намойиш қилиш, шунингдек, тижорат мақсадларида ярим эркин шароитларда, сунъий яратилган яшаш муҳитида ёки тутқунликда сақлаш бўйича фаолиятни фақатгина юридик шахслар томонидан рухсатнома асосида амалга ошириш.

Шунингдек, Санитария-эпидемиологик осойишталик ва жамоат саломатлиги хизмати, давлат ветеринария назорати ва ички ишлар органлари билан биргаликда аҳоли пунктларида ёввойи ҳайвонларни сақлаш қоидаларига риоя этилиши устидан назоратни кучайтиради. Ҳайвонот дунёсидан фойдаланиш қоидаларини бузган шахсларни қонун ҳужжатларида белгиланган тартибда жавобгарликка тортиш чоралари кўрилади.