Италиянинг қатор нашрларида 28 апрель куни футбол агенти Мино Райоланинг вафот этгани ҳақида хабарлар пайдо бўлди. «Дарё» ҳам уларга таяниб, Райоланинг 54 ёшда оламдан кўз юмгани ҳақида хабар қилганди.
Бироқ маълум вақт ўтгандан кейин агентнинг яқинлари ва айрим журналистлар бу маълумотларни рад этиб чиқди. Қайд этилишича, агент оғир аҳволда, бироқ вафот этмаган.
«У оғир касал, лекин ўлгани йўқ», — деган Райоланинг ёрдамчиси Хосе Фортес Родригес.
Райоланинг Twitter’даги расмий аккаунтида қуйидаги изоҳ қолдирилди: «Қизиқаётганлар учун ҳозирги ҳолатим: ғазабдаман, тўрт ой ичида иккинчи марта ўлдига чиқаришди».
Мино Райола 1967 йил 4 ноябрда Италияда таваллуд топган. Футбол оламида Пол Погба, Эрлинг Ҳоланд, Златан Ибраҳимович, Марио Балотелли, Генрих Мхитарян, Марко Вератти, Жанлуижи Доннарумма, Жастин Клюйверт, Matteйс де Лигт ва яна кўплаб футболчиларнинг агенти сифатида машҳур эди.
Мино 1990 йилда Sports Promotions’да футбол агенти сифатида фаолиятини бошлаган. Ушбу компанияда иш бошлаган агент 1992 йилда Брайан Ройнинг «Аякс»дан «Фоджа»га ўтиши билан шуғулланган. Бир неча йилдан сўнг Райола мустақил агент сифатида компанияни тарк этган. Илк катта трансфери эса Павел Недведнинг «Спарта»дан «Лацио»га ўтиши бўлган.
Изоҳ (0)