Italiyaning qator nashrlarida 28-aprel kuni futbol agenti Mino Rayolaning vafot etgani haqida xabarlar paydo bo‘ldi. “Daryo” ham ularga tayanib, Rayolaning 54 yoshda olamdan ko‘z yumgani haqida xabar qilgandi.
Biroq ma’lum vaqt o‘tgandan keyin agentning yaqinlari va ayrim jurnalistlar bu ma’lumotlarni rad etib chiqdi. Qayd etilishicha, agent og‘ir ahvolda, biroq vafot etmagan.
“U og‘ir kasal, lekin o‘lgani yo‘q”, — degan Rayolaning yordamchisi Xose Fortes Rodriges.
Rayolaning Twitter’dagi rasmiy akkauntida quyidagi izoh qoldirildi: “Qiziqayotganlar uchun hozirgi holatim: g‘azabdaman, to‘rt oy ichida ikkinchi marta o‘ldiga chiqarishdi”.
Mino Rayola 1967-yil 4-noyabrda Italiyada tavallud topgan. Futbol olamida Pol Pogba, Erling Holand, Zlatan Ibrahimovich, Mario Balotelli, Genrix Mxitaryan, Marko Veratti, Janluiji Donnarumma, Jastin Klyuyvert, Matteys de Ligt va yana ko‘plab futbolchilarning agenti sifatida mashhur edi.
Mino 1990-yilda Sports Promotions’da futbol agenti sifatida faoliyatini boshlagan. Ushbu kompaniyada ish boshlagan agent 1992-yilda Brayan Royning “Ayaks”dan “Fodja”ga o‘tishi bilan shug‘ullangan. Bir necha yildan so‘ng Rayola mustaqil agent sifatida kompaniyani tark etgan. Ilk katta transferi esa Pavel Nedvedning “Sparta”dan “Latsio”ga o‘tishi bo‘lgan.
Izoh (0)