Рокки Марчиано — америкалик боксчи, оғир вазн тоифасида мағлубият нималигини билмаган ягона чемпион. У ўтказган 49 жангнинг бирортасида мағлуб бўлмаган. Жаҳон чемпиони унвонини эса беш марта ҳимоя қилган. 1956 йил 27 апрелда Рокки спорт билан хайрлашганди. Қуйида шу афсонавий боксчи ҳақида сўз боради.
Болалик ва ёшлик йиллари
Боксчининг ҳақиқий исми — Рокко Френсис Марчегиано. У 1923 йил 1 сентябрда Массачусетс штатидаги Броктон шаҳрида камбағал оилада туғилган.Рокки жисмоний жиҳатдан тенгдошларига қараганда анча бақувват бўлган ва бунинг ўзига яраша сабаблари бор эди. Италиядан кўчиб келган, ногирон отаси кўп фарзандли оилага ғамхўрлик қила олмасди. Рокки эса оиласига ёрдам бериш учун ҳар қандай оғир ишни бажаришга ҳам тайёр эди: йигитлик чоғида қор тозаловчи, идиш-товоқ ювувчи, газ қувури ўрнатувчи ва ҳатто ер қазувчи бўлиб ҳам ишлаган.
Бейсбол ўйинлари вақтида ҳам у тенгдошларидан олғирроқ бўлган. Келажакда профессионал бейсболчи бўлишига ҳеч қандай тўсқинлик йўқ эди, аммо қўли кутилмаганда синиб, бу орзусидан воз кечишга мажбур бўлади.
Шу орада истеъдодли йигит бокс мураббийи Жин Кажанонинг эътиборига тушади. У Роккини ўз клубидаги машғулотларга таклиф қилиб, бўлажак спортчининг жисмоний ҳолати рингда ишлашда қўл келишини таъкидлайди.
Бокс
1943 йил Марчиано ҳарбий хизматга кетади. Уни денгиз флотига ёзиб, Буюк Британияга юборишади. Кунлардан бирида қовоқхонада маҳаллий безори билан тортишиб қолган Рокки бир мушт билан унинг танобини тортиб қўяди. Можарони кузатиб турган қовоқхона эгаси унинг маҳоратини юқори баҳолайди ва пулли жангларда қатнашишни таклиф қилади. Шундай қилиб, Рокки ўзининг жанг санъатини ривожлантира бошлайди, кейинчалик рингда қўл келадиган янги жанг усулларини ўзлаштиради. Масалан, классик боксда урф бўлмаган паст позициядан туриб жанг қилишни ўрганади.Спортчининг бўйи 180 сантиметр, вазни эса 86 килограмм эди. Бундай вазиятда рақибларга қарши жанг қилиш осон кечмасди. Лекин унинг рингдаги чапдастлиги ва оғир зарбалари рақибларига жиддий муаммолар туғдирарди. Рокки ўзининг жанг услубидаги камчиликларни таҳлил қилиб, яқин масофадан қисқа зарбалар бериш маҳоратини оширади. Ўжар спортчи маҳоратини мунтазам ошириб, енгилмас ва чайир рақибга айланади.
Марчиано ўз фаолияти давомида 49 та жанг олиб борган. Улардан 43 таси нокаут билан якунланган. Рокки бутун фаолияти давомида мағлубият нималигини билмаган. Оғир ўтган болалик уни синчков ва метин қилиб тарбиялаганди. У чекмасди, ичмасди, кундалик икир-чикирларга кўп эътибор бермай, вақтини спортга ва бу соҳада ривожланишга сарфларди.
Мутахассислар Марчианонинг техник маҳорати ва қисқа зарбалар бериш стратегиясини юқори баҳолайди. Сувга ҳук ва апперкот зарбаларини бериш унинг севимли машғулоти эди. Рокки бу билан тинимсиз икки соат шуғуллана оларди. Меҳнатсеварлик ва яхши натижаларга интилиш ўз мевасини беради: Марчиано жангларининг 83 фоизини нокаут билан якунлайди.
Роккининг биринчи шов-шувли жанги 1951 йилда Жо Луис билан бўлган. Рақиби ўшанда яхши формада эмасди, лекин барибир рингга чиқади. Жо Луис тез-тез ёш рақибларини мағлубиятга учратарди ва Роккини ҳам шундай истиқбол кутиб турган бўлиши мумкин эди. Дастлабки раундларда томошабинларнинг ҳам шунга ишончи комил бўлади. Бироқ Марчиано ўзини қўлга олиб, ғалабага эришади. Томошабинлар Рокки Марчиано исмини ҳали кўп бор эшитиши ойдинлашади. Кейинчалик кўплаб таниқли спортчилар рингда у билан тўқнаш келади.
Рокки 1952 йилда Жерси Жо Уолкотт билан жанг қилади. Ғалаба қозониш имконияти кам эди, чунки у жанг давомида кучли зарба ўтказиб, кўзи яхши кўрмай қолганди. Шунга қарамай, Марчиано ўзини қўлга олиб, жангни давом эттиради ва ғалаба қозонади. Жангдан сўнг боксчининг юзи қараб бўлмайдиган аҳволга келганди. Унга бир неча ҳафталик дам ва реабилитация зарур эди. Шу йили, яъни 1952 йилда Рокки Марчиано жаҳон чемпионига айланади.
Эззард Чарльз билан ўтган жанг ҳам томошабинлар ва мухлислар орасида катта шов-шувга сабаб бўлади. Беллашувда Роккининг бурун тешиги йиртилиб кетади, аммо рақибга таслим бўлмайди ва уни нокаутга учратиб, рингда енгилмас эканлигини исботлайди.
Унинг инсоний ҳислари ҳам зарбалари каби кучли эди. Боксчи Винги Карминони нокаутга учратганидан сўнг у ҳушига келгунича касалхонада бўлади ва жангдан тушган барча даромадни унга беради.
1955 йилда Марчиано 61 минг томошабин гувоҳлигида Арчи Мурни мағлубиятга учратади.
Мухлислар агар Муҳаммад Али билан жанг бўлиб ўтса, қандай натижа бўлиши мумкинлиги ҳақида кўп бош қотирарди. Аммо буни аниқлашнинг иложи йўқ эди, чунки Муҳаммад илк бор рингга кўтарилганида Рокки аллақачон профессионал фаолиятини якунлаганди.
Бизнес
Роккининг келиб чиқиши унга жиноий тўдалар билан алоқаларни четлаб ўтиш имконини бермасди. Спортдаги карьераси тамомланаётган вақтда у 4 миллион доллар сармояга эга эди. Марчиано жиноий тўдалар билан ҳамкорликда иш олиб боради ва судхўрлик бизнесига пул тикади.1968 йилда Рокки жиноий гуруҳ аъзоси Пьерино ди Гравио билан ишлашга ҳаракат қилиб кўради. Аммо ҳеч қандай битим тузилмайди, чунки шеригини ўлдириб кетишади. Спортчи эса солиқ органларидан инвестиция қилинган пул билан боғлиқ муаммоларни орттириб олади.
Ҳалокат
1969 йил 31 августда боксчи ўзининг шахсий самолётида ҳалокатга учраб вафот этади. Ҳодиса Аёва штати, Нютон шаҳри яқинида юз берганди. Учувчи бошқарувни йўқотиб, дарахтга бориб урилган. Бортдагиларнинг бирортаси омон қолмаган.Рокки билан боғлиқ хотиралар унинг ўлимидан кейин ҳам сақланиб қолди. Бош қаҳрамони Рокки Балбоа бўлган «Рокки» фильми енгилмас ва ўжар жангчи қиёфасини унинг издошлари учун абадийлаштирди.
Изоҳ (0)