«Опа-сингиллар» 10 ёшда: сериал қандай суратга олинган? Бош қаҳрамонлар ҳозир қандай кўринишда ва нима билан банд?

Кейинги пайтларда янги номдаги сериаллар тез-тез эфир юзини кўряпти. Баъзан уларнинг кўплиги ва актёрлар жамоасининг бир-бирига ўхшашлигидан томошабин ҳам чалкашиб кетади. Аммо 10-15 йиллар аввал телеканаллар ҳам, уларда намойиш этиладиган сериаллар ҳам кам эди. Режиссёр Замира Бегимқулованинг «Гулхан атрофидагилар», «Туташ тақдирлар» ва «Опа-сингиллар» каби ижодий ишлари сериал тақчиллиги даврида эфир юзини кўрганди. Шу боис ўзбек томошабинлари орасида бу сериални билмайдиганлар деярли топилмаса керак.

2022 йилда «Опа-сингиллар» сериали илк марта телевидение орқали намойиш этилганига 10 йил тўлди. Шу муносабат билан «Дарё» мухбири Наргиза Муродова сериал режиссёри, Ўзбекистонда хизмат кўрсатган маданият ходими Замира Бегимқулова билан суҳбатлашди. Режиссёр суҳбат давомида сериалнинг суратга олиниши билан боғлиқ қизиқарли маълумотларни ошкор этди.

Сериал олинишига ўғил кўролмасликда айбланган аёллар сабаб бўлган

— «Туташ тақдирлар» сериали намойиш этилганидан сўнг, Назар Эшонқул «Опа-сингиллар» сериали ғояси устида ишлашни таклиф этди. Ўша йиллари қиз фарзанд кўргани учун ажримлар сони ортгани, ўғил фарзанд кўролмаётган аёллар руҳий тушкунликка тушиб қолгани ҳақидаги гап-сўзлар тез-тез қулоққа чалинарди. Назар Эшонқулнинг асосий қаҳрамони Нафиса (Гавҳар Шарипова ижро этган) бўлиши керак эди. Аммо сценарий ёзилиш жараёнида қўшимча персонажлар ҳаёти ҳам очилган. Масалан, сериал аввалида Нафисанинг сингиллари Насиба ва Шаҳнозага алоҳида эътибор берилмаганди. Аммо улар орқали маълум бир муаммоларни олиб чиқишимиз мумкинлигини ҳисобга олиб, бу персонажларнинг ҳам сериалдаги ўрнини кенгайтирганмиз.

«Тўрт йил дам олишсиз ишладим»

— 2010 йилда «Опа-сингиллар» сериалини суратга олишни  бошлаганмиз. 2012 йили эса унинг илк қисми экран юзини кўрган. Ижодий гуруҳ 4 йилда 140 қисмли сериал суратга олишга муваффақ бўлган. Ҳозирги баъзи сериалчилар назарида бу узоқ муддатдек туюлиши мумкин, аммо ўша вақтдаги шароит ва бадиий савияга бу жуда яхши натижа эди. Биринчи фаслининг овозлаштириш ишлари якунланмай туриб, эфирдан олиб ташланган турк сериали сабаб ярим тайёр ишимиз эфир юзини кўрган. Куним дубляж, монтаж ва съёмка майдончасида ўтадиган бўлиб қолган. Тўрт йил давомида ҳеч қандай дам олиш кунисиз ишлашимга тўғри келган. Агар ҳозирги «Ўзбектелефильм»даги тартиб бўйича ишлаганимизда, 140 қисмли сериал учун камида 6-7 йил ишлашимиз керак эди.

«Гавҳар Шарипова билан ишлаш қийин эди»

— Олдиндан Гавҳар Шарипова билан ишлаш қийин эканлигини билардим. Кўзимни юмиб бўлса-да, у билан ишлашга қарор қилганман. Раҳматли Гавҳар Шарипова яхши актриса эди, аммо феъл-атвори оғир бўлгани учун ҳамма ундан қочарди. Роллар тақсимланганида оператор Саъдулла Ўринбоев олдимга келиб: «Опа, Гавҳарнинг қандайлигини яхши билардингиз-ку, яна у билан ишлайсизми?» деганди. Ҳақиқатан ҳам «Гулхан атрофидагилар» сериалида Гавҳар билан баъзи муаммолар келиб чиққанди. Аммо Гавҳарнинг кўзларида дард бор эди. Съёмка майдончасига ўз вақтида келарди, айтилган вазифани бажарарди. Аммо шўрлик пулдан анча қийналарди. «Менга кўпроқ гонорар ёзинг, аҳволимни биласиз-ку», дерди. «Опа-сингиллар» сериалининг биринчи ва иккинчи фаслларида яхши ишлаганмиз. Аммо учинчи фасли суратга олинаётганда кўп тортишганмиз, аксига олиб у ролдан четлаштиролмаслигимни билиб, кўпроқ пул беришимни сўрарди. Мен ажратилган пулдан ортиғини беролмаслигимни тушунтирардим. Хуллас, кадр ортида мана шундай муаммолар бўлган. Сериал продюсери Музаффар Саъдуллаев («Осмондаги болалар» фильмидаги Ҳамдам сериалга продюсерлик қилган) билан Гавҳарни рози қилиш учун қўлдан келганча ҳаракат қилгандик.

«Расулхонни ролга чақирмайман, деб аҳд қилгандим»

— Икром ролига ҳам ҳам баъзи муаммолар бўлган. Расулхон Қодирхоновни «Туташ тақдирлар» сериалига таклиф этгандим. Ролга тасдиқланиб, суратга олиш ишлари бошланишига оз қолганида «Мен театрга ишга киряпман, раҳбарлар съёмкаларга боришимни тақиқлашди», деган. Шундан кейин ундан ранжиб, энди ролларга таклиф этмайман, деб аҳд қилгандим. Икром ролига Элбек Файзиевни олгандим. Аммо Назар Эшонқул «Элбекда қашқадарёлик йигитларга хос шахт ва шиддат бор. У ўзбекнинг Ромеоси ёки Отабеги бўлолмайди», деганди. Бу ҳақида узоқ ўйладим. «Ўткан кунлар»даги Отабек ҳам ота-онасига қарши чиқолмаганидек, Икром ҳам шундай бўлиши керак, деган тўхтамга келдим. Аммо «Расулхонни ролга чақирмайман», деган аҳдим сабаб бошқа актёрларни ҳам синаб кўрганман. Ижро яхши бўлса-да, улардан сценарийдаги Икромни тополмаганман. Шундай кейин Расулхон Қодирхоновни ролга чақирганман.

«Клон» сериалидан олинган персонаж

— «Клон» сериалини кўрганлар бўлса, яхши билишади. Унда кўзлари айёр ва ўта устомон Алисения деган образ бор. Ролдан таъсирланиб юрганимда, худди шу актрисани бошқа фильмда ҳам учратдим. Икки рол бир-биридан тубдан фарқ қиларди. Ёш актриса Заҳро Мирзаевани мослаб, Алисенияга ўхшаш персонаж яратишга қарор қилдим. Актриса «опа-опа» деб одамларнинг ишончини оладиган айёр аёл ролини маромига етказиб ижро этган.

Сериал «Осмондаги болалар»даги Ҳамдамнинг уйида олинган

— Сериал съёмкалари жуда узоқ вақт давом этади. Бу вақт мобайнида уй эгалари уй қурилиши ва жиҳозларнинг жойлашувини ўзгартирмасликлари керак. Албатта, бу нарса ҳаммага ёқмайди. «Меҳмоннинг иззати уч кун» дейишганидек, сериалчилар ҳам тезда уларнинг жонига тегиб қолади. «Туташ тақдирлар» сериалида уй-жой билан боғлиқ муаммоларга кўп учраганмиз. Музаффар Саъдуллаев муаммо чиқмаслиги учун съёмкага ўзи ва қариндошларининг уйини берган. Тўрт йил давомида улардан беминнат фойдаланганмиз.

Сериалда бош қаҳрамонларни гавдалантирган актёрлар

Ўтган вақт мобайнида «Опа-сингиллар» сериалида актёр ва актрисаларнинг ҳаёти ва фаолиятида жиддий ўзгаришлар бўлгани аниқ. Хўш, сериал бош қаҳрамонлари айни кунларда нималар билан банд?

Сериалда Диёра ролини ижро этган Камола Арслонова саккиз йилдан буён Туркияда яшайди. Диёра тахаллуси билан ҳам ижод қилиб, ўнлаб қўшиқлар ижро этган актриса 2014 йилнинг декабрь ойида туркиялик Месут исмли тадбиркорга турмушга чиққан. Айни пайтда Измир шаҳрида оиласи билан бахтли ҳаёт кечираётган Камола Арслонова иккинчи фарзандига ҳомиладор. Унинг тўрт ёшли Ахсен исмли қизи ҳам бор.

Икром ролини ижро этган актёр Расулхон Қодирхонов Муқимий номидаги Ўзбекистон давлат мусиқий театрида фаолият юритади. У 25 ёшида «Опа-сингиллар» сериалида суратга тушган.

Наргиза Шерматова 21 ёшида «Опа-сингиллар» сериалида Насиба ролини ижро этган. У ҳозирги кунда оилали ва фарзанди Ясинбекнинг тарбияси билан банд.

Азиз Қобилов «Опа-сингиллар» сериали орқали дебют ролини ижро этган. У айни кунда Ўзбек миллий академик драма театрида фаолият юритади.

Сериалда Жавлон ролини ижро этган актёр Элбек Файзиев ҳозирги кунда суратга олинаётган кўплаб тарихий фильмларда суратга тушмоқда. У «Мендирман Жалолиддин» сериалида ҳам ажойиб ролни ижро этган.

«Опа-сингиллар» сериалида Мурод ролини ижро этган актёр Беҳзод Мирзаев ҳозирги кунда Ўзбекистон давлат санъат ва маданият институтида талабаларга актёрлик маҳорати фанидан сабоқ беради.

Сериалдаги асосий қаҳрамон Нафиса ролини ижро этган актриса Гавҳар Шарипова 2019 йили вафот этган.