Тошкентда трамвай қурилиши 2023 йилдан бошланиши кутилмоқда. Бу ҳақда «Kun.uz» транспорт тизимидаги манбасига таяниб маълум қилди.
Маълум қилинишича, шаҳарда трамвай ҳаракатини ташкил этиш бўйича дастлабки ишлар бошланган: хорижга чиқиб кетган собиқ трамвайчиларни қайтариш ва хориждан мутахассислар жалб қилиш ишлари кетмоқда. Хусусан, Туркия ва Чехиядан мутахассислар чақирилмоқда.
«Аввал Тошкентнинг барча такси, автобус йўллари харитага туширилиб, гавжум жойлар аниқланади. Эски тажрибани бугунга ишлатиб бўлмайди: шаҳар инфраструктураси, аҳоли оқими кўп бўлган жойлар ўзгарган. Бу борада ҳамма режаларни очиқлай олмайман. Чунки лойиҳа ҳали охирига етгани йўқ. Бошқа тарафдан ҳали трамвай қайси кўчалардан ўтиши ҳам аниқмас. Айтганимдек, ҳали таҳлиллар ниҳоясига етмаган», — дейди нашр манбаси.
Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва «Ипподром» ўртасида қатновчи 17-йўналиш ёпилганди.
Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Айнан ушбу кўрсатувда тележурналист Хайрулла Нуриддинов Тошкентга трамвай қатновини қайтариш тарафдори эканини айтиб ўтган эди.
«Шаҳар транспорти мавзуси очилганидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимизда-ку ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда ана шу ташаббус билан чиққан бўлардим», — деганди Хайрулла Нуриддинов.
Шавкат Мирзиёев 10 февраль куни Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтди. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деган эди президент.
Тошкент шаҳар ҳокими ўринбосари Бахтиёр Раҳмонов 16 февраль куни пойтахт ҳокимлигида бўлиб ўтган матбуот анжуманида Навоий кўчасида трамвай бўлмаслигини айтган эди. Транспорт бошқарма бошлиғи Анвар Жўраев эса трамвай бўйича таклифлар борлигини билдирганди.
Изоҳ (0)