Самарқандда 1,5 млрд сўм кредит маблағини ўзлаштирган жамият раҳбарига жиноят иши қўзғатилди

Самарқанд вилоятининг Тойлоқ туманида кредит маблағларини ўзлаштирган МЧЖ раҳбари аниқланди, деб хабар беради Бош прокуратура ҳузурдаги департамент.

Маълум қилинишича, департаментнинг Тойлоқ туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Текширув давомида «Д.I.» МЧЖ раҳбари Ш.П. корхонага қарашли омборхона ва савдо дўконлари бўлмаса-да, сохта ҳужжатларни расмийлаштириш орқали бошқа бир тадбиркорга тегиши экскаваторни гаров сифатида қўйиб, банк филиалидан айланма маблағларни тўлдириш учун 1,5 миллиард сўм кредит ажратилишига эришгани аниқланган. У кредит маблағидан мақсадсиз фойдаланиб, талон-торож қилган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Чирчиқда корхона раҳбари тадбиркорнинг 533,6 миллион сўмлик мулкини талон-торож қилгани, Фарғона ва Наманганда ўзгалар номига кредит расмийлаштирган шахсларга жиноят иши очилгани, Бухорода жамият раҳбари 11 кишидан фирибгарлик билан олган пулларга Spark, Malibu ва Captiva сотиб олгани тўғрисида хабар берилганди.