Нукусда иссиқхона қуриш учун ажратилган ерни 170 млн сўмга сотмоқчи бўлган шахс аниқланди

Нукус шаҳрида иссиқхона қуриш учун ажратилган ер майдони сотилишининг олди олинди, деб хабар беради Бош прокуратура ҳузуридаги департамент.

Маълум қилинишича, департамент ҳамда ДХХнинг Қорақалпоғистон Республикаси бошқармалари томонидан ИИВ ходимлари билан ҳамкорликда тезкор тадбир ўтказилган. Тадбирда П.Й. исмли шахс ўзига шаҳарнинг «Алланияз Қаҳрамон» МФЙ ҳудудида иссиқхона қуриш учун ажратилган 9 сотих ер майдонини фуқаро Т.га фирибгарлик йўли билан 170 миллион сўмга сотишга келишгани аниқланган. У келишилган пулдан 80 миллион сўмни олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Зангиотада 5,9 миллиард сўм имтиёзли кредит маблағларини талон-торож қилган раҳбарлар аниқлангани, Самарқандда ўзгалар номига 156 миллион сўм кредит расмийлаштирган собиқ банк ходимига жиноят иши очилгани тўғрисида хабар берилганди.