Жиззах вилоятининг Фориш туманида келган сел 53 та хонадонни яшаб бўлмас даражага келтирди. Беш нафар фуқаро ўлимига сабабчи бўлди. Ачинарлиси, марҳумларнинг уч нафари бир хонадон вакиллари эди. Бу ҳақда воқеа жойида бўлган «Дарё» мухбири хабар берди.
Маълум қилинишича, сел 2022 йилнинг 20 апрель куни тушдан сўнг келган ва 1 соат-у 30 дақиқа давом этган.
«Аммо сел 12 дақиқада қишлоқ тақдирини ҳал қилди. 26 бош сигир, юзлаб майда шохли молларни оқизиб кетди. Бир оиланинг уч нафар вакили — ёш она ва унинг ҳали она сути оғзидан кетмаган жажжи қизалоқлари сел қурбонига айланди», — дейди шу қишлоқда яшовчи аҳоли вакилларидан бири.
Фориш тумани ҳокимлиги ахборот хизмати раҳбари Рашид Каримовнинг мутахассислар маълумотига таяниб хабар беришича, ҳудуддаги сел бешта сойдан оққан сел сувлари қўшилиши натижасида юзага келган.
«Сел ‘Эгизбулоқ’да жойлашган 263 та хўжаликдан ўтиб, уларнинг 53 тасини тўлиқ яроқсиз ҳолга келтирган. 44 тасига эса ўртача ва 163 тасига енгил даражада талафот етказган. Шунингдек, сел ҳудуддаги 15-мактаб ва 9-боғча ҳудудига ҳам кирган. 1,5 км ички йўлларга сел сувлари тошиши оқибатида транспорт воситалари ҳаракати вақтинчалик тўхтатилган», — дейди Рашид Каримов.
«Дарё» мухбири билан суҳбатлашган қишлоқ вакилларининг айтишича, қишлоққа 80 йил илгари худди шундай сел келган. Ундан кейинги йиллардаги селлар бу даражада ваҳимали ва талафотли бўлмаган.
«Тушлик қилиб бўлгач, соатга қараганимда 13:40 экан. Бироздан сўнг қаттиқ овоз эшитилди. Кўчага ‘КаМАЗ’ келдими деб, югуриб чиқдим. Чиқсам, ҳовлини сув боса бошлади. Югуриб уйга кирдим ва уйдаги стол устига чиқдим. Сув яна кўпайгач, столнинг устига кир ювиш машинасини ҳам қўйдим ва унинг устига чиқдим. Кейин сув қўшнининг уйи деворини бузиб ўтди. Мен эса ваҳимага туша бошладим. Яхшиям уйда фақат ўзим эдим. Шу ҳолатда зўрға жон сақладим», — дейди воқеа ҳақида гапирган Шавкат Сойибов.
Фориш тумани ҳокими ўринбосари Абдуманнон Саидхонов айни пайтда «Эгизбулоқ» МФЙда жойлашган 25 та хўжаликда истиқомат қилувчи 100 дан ортиқ фуқаролар вақтинчалик яшаш учун яқин қариндошларининг уйига кўчирилганини айтмоқда. Улар учун ҳаётий зарур маҳсулотлар захирасини шакллантириш мақсадида штаб ҳам ташкил этилган.
Вилоят Фавқулодда вазиятлар бошқармаси ахборот хизмати раҳбари Фаррух Абдураҳмоновнинг маълумот беришича, айни кунгача ҳудудга 15 та органдан 1363 нафар ёрдамчи куч ҳамда 63 та техника жалб қилинган бўлиб, сел оқибатларини бартараф этиш билан шуғулланмоқда.
«Дарё» ижодий жамоаси воқеа тафсилотларини ўрганишда давом этмоқда.
Изоҳ (0)