Ўзбекистон таълим муассасаларига ўқишга қабул қилиш бўйича Давлат комиссияси томонидан Украинадан қайтиб, республика олий таълим муассасаларига ўқишини кўчириш истагини билдирган фуқароларнинг аризаларига мувофиқ, уларнинг ўқишини соддалаштирилган тартибда кўчиришга рухсат берилди. Бу ҳақда Олий ва ўрта махсус таълим вазирлиги маълум қилди.
Шу муносабат билан, вазирлик ариза топширган талабалар 2022 йил 26 апрелдан ўқишни кўчириш истагини билдирган олий таълим муассасасига мурожаат қилишларини сўраган.
Бунда, ўқишини кўчиришга рухсат берилган фуқароларнинг ҳужжатларини расмийлаштиришда аввалги йилларда таҳсил олиб, сўнгги йилларда талабалар сафидан четлатилган ёки академик таътилда бўлган фуқароларнинг ўқишини кўчиришга рад жавоби берилади.
Эслатиб ўтамиз, 24 февраль куни Украинада таълим олаётган ўзбекистонлик талабалар ўз ватанига вақтинчалик жўнаб кетиши сабаб мамлакат олий ўқув юртларидаги ўқишларини сақлаб қолиш масаласи бўйича кўплаб мурожаатлар келиб тушаётганини инобатга олган ҳолда, мурожаат билан чиққанди. Унга кўра, Украина Таълим ва фан вазирлиги 2022 йил 25 январдаги 1/1266-сонли ва 2022 йил 15 февралдаги 1/2588-22-сонли хати билан Украинанинг барча олий ўқув юртларига масофавий таълимни жорий этишни тавсия қилган.
Март бошларида президент Шавкат Мирзиёев талабаларни бандлигини таъминлаш орқали уларнинг турмуш даражасини ошириш юзасидан видеоселектор ўтказганди. Ўшанда Олий таълим вазирлиги, Ташқи ишлар вазирлиги, вилоят ҳокимлари бошчилигида комиссия ташкил этилиши ва ушбу комиссия бир ҳафта муддатда Украинадан қайтган талабаларни ўзимиздаги олийгоҳларда ўқишини давом эттириши учун барча шароитларни яратиб бериши маълум қилинган эди.
Изоҳ (0)