Шавкат Мирзиёев иштирокида Қарши шаҳрида халқ депутатлари вилоят кенгашининг навбатдан ташқари сессияси бўлиб ўтмоқда, деб хабар берди «Дарё» мухбири.
Давлат раҳбарининг таъкидлашича, Инфратузилма дастури доирасида ва қўшимча ажратилган 62 миллиард сўм ҳисобидан, 4,5 мингта синфхонани 66 мингта парта ва 5 мингта доска билан таъминлаш чоралари кўрилади.
Масъулларга қўшимча ажратилган 337 миллиард сўм ҳисобидан, ичимлик сув таъминоти ва канализация тизимини яхшилаш бўйича лойиҳаларни бир ҳафта муддатда бошлаши кераклиги топширилди.
«Шунингдек, 2022 йилда қўшимча ажратилаётган 125 миллиард сўм ҳисобидан, Косон, Нишон ва Касби туманларидаги 150 километр яроқсиз лотокларни алмаштиришни таъминлаши ҳамда янги технологияларни қўллаши лозим. Бундан ташқари 354 миллиард сўм эвазига, йўллар ва кўприкларни таъмирлаш ишларини сифатли амалга ошириши лозим», — дейди давлат раҳбари.
Мутасаддиларга, шунингдек, қўшимча ажратилган 93 миллиард сўм ҳисобидан, тиббиёт, спорт объектларини таъмирлаш ва реконструкция қилиш, ободонлаштириш ишларини таъминлаши кераклиги айтилди.
Ургут эркин иқтисодий зонаси филиали ҳудуди орқали, 15 километр темир йўл қуриши зарурлиги, бунга бюджетдан 50 миллиард сўм берилиши таъкидланди.
Бундан ташқари Қашқадарёда ижтимоий соҳа ва инфратузилмани яхшилаш бўйича алоҳида Ишчи гуруҳи тузилади. Ишчи гуруҳи ҳар ҳафтада 4 кун Қашқадарёда бўлиб, ишларни самарали ташкил этади, марказлашган ва қўшимча маблағларнинг манзилли ҳамда мақсадли ишлатилишини назорат қилади.
Изоҳ (0)