«Қулупнайлар ходимлар томонидан тўкиб ташланмаган». ИИВ Юқори Чирчиқда қулупнай сотувчи аёллар билан содир бўлган воқеа бўйича маълумот берди

Ижтимоий тармоқларда қулупнай сотувчи аёллар ИИБ биносига қамаб қўйилгани, уларнинг сотиш мақсадида кўчага олиб чиққан қулупнайлари олиб қўйилиб узоқ вақт сақлангани учун яроқсиз ҳолга келгани тасвирланган видео тарқалди. Ички ишлар вазирлиги ҳолат аслида қандай бўлгани тўғрисида лавҳа тайёрлаб, ижтимоий тармоқ фаоллари воқеани бошқача талқин қилаётганини маълум қилди.

Тошкент вилоятининг Юқори Чирчиқ туманида йўлнинг қатнов қисмида, ҳаракат хавфсизлигига халақит бериб қулупнай савдоси билан шуғулланаётган фуқароларнинг жамоат хавфсизлигини таъминлаш мақсадида жалб этилган ички ишлар органлари ходимларига қаршилик кўрсатиб, жанжал уюштирганликлари акс этган видеолари тарқалмоқда. Интернет фойдаланувчилари ИИБ ходимлари сотувчиларнинг қулупнайларини тўкиб ташлагани ёки яроқсиз ҳолатга келтирганини айтмоқда.

ИИВ томонидан тайёрланган лавҳада маълум қилинишича, воқеа содир бўлган куни ички ишлар ходимлари сотувчилардан серқатнов автомобиль йўлида савдо қилмасликни, бу йўл-транспорт ҳодисаларини юзага келтириши мумкинлигини айтган.

«Икки нафар аёлнинг олдига борганимизда бизнинг огоҳлантиришимизга қарамасдан, ички ишлар ходимининг қонуний талабини бажармасдан, савдо-сотиқни тўхтатмади. Тарозисини машина олиб қўяётганимизда Элмира исмли сотувчи автомобилимизга ёпишиб, машина калитини олиб қўйди», — дейди Юқори Чирчиқ ИИБ ходими Шерзод Аҳмадов.

Таъкидланишича, бу орада вазиятдан тўлиқ хабардор бўлмаган бошқа сотувчилар жараёнга аралашиб, ҳолатни тасвирга олган ҳолда уларнинг хизмат фаолиятига фаол қаршилик кўрсатган.

Ўша куни ИИО ходимларининг қонуний талабларига бўйсунмаган ва фаол қаршилик қилган фуқаролар туман ИИБга олиб келинган ва тушунтириш ишлари олиб борилган. Ҳолат юзасидан тегишли ҳужжатлар расмийлаштирилган.

ИИБ ходимининг айтишича, сотувчи Элмира тарозини олишга борганида унинг қайнонаси қулупнай турган пештахтага туртилиб кетган ва тўртта идишдаги мева тўкилиб кетган. «Ходимлар томонидан қулупнайларни отиб ташлаш, ерга тепиш ҳолатлари бўлмади», — дейди ички ишлар масъули.

ИИВ ахборот хизмати раҳбари Шоҳрух Ғиёсов мазкур воқеани изоҳлар экан, буни ҳодисаларни бўрттириш ва ички ишлар органлари ходимларини ёмонотлиқ қилиб кўрсатишга шайланган «жамоатчилик вакиллари»нинг иши дея баҳолаганди.

«Бундай ҳодисаларни бўрттириш ва ички ишлар органлари ходимларини ёмонотлиқ қилиб кўрсатишга шайланган ‘жамоатчилик вакиллари’ фаоллашганини инобатга олиб, ҳақиқий жамоатчилик назорати субъектларидан йўл ёқаларидаги тартибсиз савдо-сотиқ билан боғлиқ муаммолар, улар ортидан келиб чиқаётган йўл-транспорт ҳодисалари ва ҳоказо масалаларга кўпроқ эътибор қаратишларини мақсадга мувофиқ деб ҳисоблаймиз», — деган у.