Жасур Умировдан «Миллион» ва Юлдуз Усмоновагача. «Халқлар дўстлиги»да ўтказилиши режалаштирилаётган концертларга кириш қанчага тушади?

«Халқлар дўстлиги» санъат саройида май ва июнь ойида ўтказилиши режалаштирилган концертлар ва уларнинг чипта нархлари билан танишинг.

«Беном» гуруҳи

«Беном» гуруҳининг «Яна бу биз» деб номланган концерт дастури 3-, 4-, 5 май кунлари  «Халқлар дўстлиги» санъат саройида бўлиб ўтади. Чипталарни 30 минг сўмдан 300 минггача бўлган нархда харид қилишингиз мумкин. Бу концертга чипта топиш муаммо эмас.

Рустам Ғойипов

Лирик қўшиқларнинг моҳир ижрочиси Рустам Ғойиповнинг концерти эса 6—7 май куни бўлиб ўтади. Чипталарни 40 минг сўмдан 350 минг сўмгача бўлган нархда харид қилишингиз мумкин. Бу хонанданинг концертига чипта топиш қийин эмас.

Озода Нурсаидова

9—16 май кунлари Озода Нурсаидованинг концертига старт берилади. Унинг концертига кириш нархлари 25 минг сўмдан, 300 минг сўмгача қилиб белгиланган. Фақат марказдаги барча ўрин билетлари сотилган, фақатгина чеккадаги ўриндиқни 200 минг сўмдан банд этишингиз мумкин. Хонанда концертига талаб юқори бўлгани учун «қора бозор»даги савдолар ҳам авжида. Кассадан топилмаган марказ чипталарини у ердан 400-500 минг сўмдан топиш мумкин.

«Миллион» жамоаси

«Миллион» жамоасининг бу йилги концерти ҳам анча талабгир. Бошқа кассаларда одамлар у қадар тирбанд эмас, аммо «Миллион»нинг чипталари сотиладиган касса одамлар билан гавжум. 17—24 май кунлари ўтиши режалаштирилаётган концерт чипталари 40 минг сўмдан 450 минг сўмгача этиб белгиланган.

Ҳамдам Собиров

25—26 май кунлари Ҳамдам Собировнинг «Мактабимда» деб номланган концерт дастури бўлиб ўтади. Хонанда битирувчилар кунини банд этган бўлса-да, ҳозирча концертга билет топиш муаммо эмас. Чипта сотувчи аёлнинг гапига кўра, 30 мингдан 300 минггача бўлган нархда чипталарни сотиб олиш мумкин.

Юлдуз Усмонова

Юлдуз Усмонова эски қўшиқларини соғинган мухлислари учун 27—31 май кунлари концерт бериши ҳақида маълум қилгандик. Хонанда яқиндагина концерт берганига қарамай, доимгидек унинг  чипталари талабгир. Ёки маъмурлар ишини қойилмақом бажаришади. Чунки 5 кунлик концертнинг фақат олд чипталари сотувга чиқарилган. Чипта сотувчи аёл бизга орқа қатор ва балкон чипталари сотиб бўлинганлигини маълум қилди. 3–14-қаторгача бўлган чипталарни эса 200 минг сўмдан 450 минг сўмгача бўлган нархда харид қилиш мумкин.

Дилмурод Султонов

Хоразмлик ёш хонанда Дилмурод Султонов 2-, 3-, 4 июнь кунлари яккахон концерт дастури тақдим этади. Концерт чипталари 30 минг сўмдан 300 минг сўмгача этиб белгиланган. Ҳамёнингиз кўтарганча чипталарни харид қилаверасиз, чунки уларни топиш муаммо эмас.

Жалолиддин Аҳмадалиев

7—8 июнь ёш хонанда Жалолиддин Аҳмадалиев «Халқлар дўстлиги» санъат саройидаги илк яккахон концерт дастурини ўтказади. Концерт чипталари 80 минг сўмдан 400 минг сўмгача бўлган нархда сотувга чиқарилган. Аммо чипталар бор-йўғи бир ой аввал сотувга чиқарилган бўлса-да, уларнинг анча-мунчаси сотиб бўлинган.

Воҳиджон Исоқов

14—15 июнь кунлари хонанда Воҳиджон Исоқовнинг концерт дастури бўлиб ўтади. Концерт чипталари 25 минг сўмдан 300 минг сўмгача бўлган нархда сотилмоқда. Чипталарни харид қилиш имконияти жуда юқори, ҳатто олд қатор чипталари ҳам ҳали сотилмаган.

Руслан Шарипов хотирасига бағишланган концерт

9 июнь куни марҳум ижодкор Руслан Шарипов хотирасига бағишлаб, концерт дастури ташкиллаштирилади. Концерт баннерларига кўра, унда Фарруҳ Зокиров, Муниса Ризаева, Рашид Холиқов, Тоҳир Содиқов каби мега юлдузлар иштирок этади. Чипталарни 60 минг сўмдан 350 минг сўмгача нархда сотиб олишингиз мумкин.

Жасур Умиров

Хонанда Жасур Умировнинг узоқ кутилган концерт дастури 16—17 июнь кунлари бўлиб ўтади. Концерт чипталарини 30 минг сўмдан 300 минг сўмгача бўлган нархда харид қилишингиз мумкин. Ҳозирча чипталарни топиш умуман муаммо эмас.

Оғабек Собиров

Ўзбекистонда хизмат кўрсатган артист Оғабек Собировнинг «Етказганига шукр» номли концерти 20—21 июнь кунлари бўлиб ўтади. Концерт чипталари 40 минг сўмдан 300 минг сўмгача бўлган нархда сотувга чиқарилган.