“Xalqlar do‘stligi” san’at saroyida may va iyun oyida o‘tkazilishi rejalashtirilgan konsertlar va ularning chipta narxlari bilan tanishing.
“Benom” guruhi
“Benom” guruhining “Yana bu biz” deb nomlangan konsert dasturi 3-, 4-, 5-may kunlari “Xalqlar do‘stligi” san’at saroyida bo‘lib o‘tadi. Chiptalarni 30 ming so‘mdan 300 minggacha bo‘lgan narxda xarid qilishingiz mumkin. Bu konsertga chipta topish muammo emas.
Rustam G‘oyipov
Lirik qo‘shiqlarning mohir ijrochisi Rustam G‘oyipovning konserti esa 6—7-may kuni bo‘lib o‘tadi. Chiptalarni 40 ming so‘mdan 350 ming so‘mgacha bo‘lgan narxda xarid qilishingiz mumkin. Bu xonandaning konsertiga chipta topish qiyin emas.
Ozoda Nursaidova
9—16-may kunlari Ozoda Nursaidovaning konsertiga start beriladi. Uning konsertiga kirish narxlari 25 ming so‘mdan, 300 ming so‘mgacha qilib belgilangan. Faqat markazdagi barcha o‘rin biletlari sotilgan, faqatgina chekkadagi o‘rindiqni 200 ming so‘mdan band etishingiz mumkin. Xonanda konsertiga talab yuqori bo‘lgani uchun “qora bozor”dagi savdolar ham avjida. Kassadan topilmagan markaz chiptalarini u yerdan 400-500 ming so‘mdan topish mumkin.
“Million” jamoasi
“Million” jamoasining bu yilgi konserti ham ancha talabgir. Boshqa kassalarda odamlar u qadar tirband emas, ammo “Million”ning chiptalari sotiladigan kassa odamlar bilan gavjum. 17—24-may kunlari o‘tishi rejalashtirilayotgan konsert chiptalari 40 ming so‘mdan 450 ming so‘mgacha etib belgilangan.
Hamdam Sobirov
25—26-may kunlari Hamdam Sobirovning “Maktabimda” deb nomlangan konsert dasturi bo‘lib o‘tadi. Xonanda bitiruvchilar kunini band etgan bo‘lsa-da, hozircha konsertga bilet topish muammo emas. Chipta sotuvchi ayolning gapiga ko‘ra, 30 mingdan 300 minggacha bo‘lgan narxda chiptalarni sotib olish mumkin.
Yulduz Usmonova
Yulduz Usmonova eski qo‘shiqlarini sog‘ingan muxlislari uchun 27—31-may kunlari konsert berishi haqida ma’lum qilgandik. Xonanda yaqindagina konsert berganiga qaramay, doimgidek uning chiptalari talabgir. Yoki ma’murlar ishini qoyilmaqom bajarishadi. Chunki 5 kunlik konsertning faqat old chiptalari sotuvga chiqarilgan. Chipta sotuvchi ayol bizga orqa qator va balkon chiptalari sotib bo‘linganligini ma’lum qildi. 3–14-qatorgacha bo‘lgan chiptalarni esa 200 ming so‘mdan 450 ming so‘mgacha bo‘lgan narxda xarid qilish mumkin.
Dilmurod Sultonov
Xorazmlik yosh xonanda Dilmurod Sultonov 2-, 3-, 4-iyun kunlari yakkaxon konsert dasturi taqdim etadi. Konsert chiptalari 30 ming so‘mdan 300 ming so‘mgacha etib belgilangan. Hamyoningiz ko‘targancha chiptalarni xarid qilaverasiz, chunki ularni topish muammo emas.
Jaloliddin Ahmadaliyev
7—8-iyun yosh xonanda Jaloliddin Ahmadaliyev “Xalqlar do‘stligi” san’at saroyidagi ilk yakkaxon konsert dasturini o‘tkazadi. Konsert chiptalari 80 ming so‘mdan 400 ming so‘mgacha bo‘lgan narxda sotuvga chiqarilgan. Ammo chiptalar bor-yo‘g‘i bir oy avval sotuvga chiqarilgan bo‘lsa-da, ularning ancha-munchasi sotib bo‘lingan.
Vohidjon Isoqov
14—15-iyun kunlari xonanda Vohidjon Isoqovning konsert dasturi bo‘lib o‘tadi. Konsert chiptalari 25 ming so‘mdan 300 ming so‘mgacha bo‘lgan narxda sotilmoqda. Chiptalarni xarid qilish imkoniyati juda yuqori, hatto old qator chiptalari ham hali sotilmagan.
Ruslan Sharipov xotirasiga bag‘ishlangan konsert
9-iyun kuni marhum ijodkor Ruslan Sharipov xotirasiga bag‘ishlab, konsert dasturi tashkillashtiriladi. Konsert bannerlariga ko‘ra, unda Farruh Zokirov, Munisa Rizayeva, Rashid Xoliqov, Tohir Sodiqov kabi mega yulduzlar ishtirok etadi. Chiptalarni 60 ming so‘mdan 350 ming so‘mgacha narxda sotib olishingiz mumkin.
Jasur Umirov
Xonanda Jasur Umirovning uzoq kutilgan konsert dasturi 16—17-iyun kunlari bo‘lib o‘tadi. Konsert chiptalarini 30 ming so‘mdan 300 ming so‘mgacha bo‘lgan narxda xarid qilishingiz mumkin. Hozircha chiptalarni topish umuman muammo emas.
Og‘abek Sobirov
O‘zbekistonda xizmat ko‘rsatgan artist Og‘abek Sobirovning “Yetkazganiga shukr” nomli konserti 20—21-iyun kunlari bo‘lib o‘tadi. Konsert chiptalari 40 ming so‘mdan 300 ming so‘mgacha bo‘lgan narxda sotuvga chiqarilgan.
Izoh (0)