Женнифер Лопес, Никол Кидман ҳамда бошқа жаҳонга машҳур аёлларнинг ёшартирувчи парҳезлари

Агар кимдир ёш кўринишни қандай сақлаб қолишни билса, бу, албатта, Голливуд юлдузларидир. Улардан баъзилари 50 дан ўтган, аммо 35 ёш каби кўринади. Буларнинг барчаси нафақат косметологларга, балки турмуш тарзи, шу жумладан маълум бир парҳезга ҳам боғлиқ. «Lisa.ru» нашри Голливуд актрисаларининг ёшликни абадий сақлаб қолиш борасидаги сирларини очиб берди.

Женнифер Энистон — 53 ёш

Энистон интервал очликка амал қилишини яширмайди. У 16 соат давомида ҳеч нарса емайди, эрталаб соат 10:00 га қадар нонушта қилмайди ва биринчи бўлиб селдер шарбатини ичади. Шунингдек, мувозанатли овқатланишга содиқ қолади, авокадо ва қизил икра каби соғлом ёғларга, шунингдек, углевод, оқсил ва сабзавотларга устунлик беради.

Женнифер Лопес — 52 ёш

Лопес ширинликлар ва қайта ишланган маҳсулотлардан воз кечишдан ташқари, кунига камида етти стакан сув ичади. Сув организмни ичкаридан намлантиришга ёрдам беради — яъни у ташқи томондан ҳам намликни сақлайди, терини силлиқлайди. Шунингдек, тўқлик ҳиссини назорат қилади.

Риз Уизерспун — 46 ёш

Риз Узерспун оз-оздан тез-тез овқатланишга амал қилади. Унинг асосий принципи шундаки, кун давомида бир нечта кичик қисмдаги маҳсулотлардан бир неча марта истеъмол қилади. Бу очликни чеклашга ва энергия даражасини оширишга ёрдам беради. Бундан ташқари, бу нафақат организмнинг ёшлиги учун масъул бўлган, балки диққатни жамлаш, хотира ва кўришда муҳим роль ўйнайдиган қонда шакар даражасини барқарор ушлаб туришнинг самарали усулидир.

Холли Берри — 55 ёш

Актрисанинг ёшлигини сақлаб қолишнинг калити унинг соғлом ёғларга ва кето парҳезига бўлган муҳаббатидир. У ўз организмини ёғдан фойдаланишга ўргатди, чунки бу парҳезнинг асосий таркибий қисми, аммо ундаги углеводлар имкон қадар камаяди. Актриса мунтазам равишда ёнғоқ, уруғ ва авокадоларни истеъмол қилади, бу озиқ-овқатлар таркибида терининг саломатлиги ва кўринишини яхшилайдиган, шунингдек, тўйинганлик туйғусини узайтирадиган озиқ моддалар мавжуд.

Камерон Диас — 49 ёш

Диас кўкатлар ҳамда яшил сабзавотларни истеъмол қилади. Ушбу маҳсулотлар организмни клетчатка билан таъминлайди, бу эса узоқ вақт тўқлик ҳиссини беради. Бундан ташқари, кўкатларда организмнинг қариши билан фаол курашадиган кўплаб антиоксидантлар мавжуд. Қолаверса, Диас ширинликларга мутлақо бефарқ эканини ҳам айтиб ўтган.

Ким Кардашьян — 41 ёш

Кардашьяннинг овқатланишда асосий қоида шундаки, агар маҳсулот табиий равишда ўстирилмаган бўлса, уни емайди. Оддий қилиб айтганда, Ким вегетариан бўлиб, бу ҳам унинг ёш кўринишига ёрдам беради. Бундан ташқари, Ким қайта ишланган маҳсулотларни рациондан бутунлай чиқариб ташлаган.

Кристен Белл — 41 ёш

Белл маҳсулотлар ёрлиқларини ўқишда уста эканини айтиб ўтган ва истеъмол учун овқат ва газакларни шундай танлайди. Шунингдек, у оқсил, ёғ ва углеводлар миқдорини диққат билан назорат қилади. Агар у кўп оқсил истеъмол қилган бўлса, у кейинги овқатни углевод ва клетчаткага бойроқ қилишга ҳаракат қилади. Кристен кунлик овқат ҳақида олдиндан ўйлаб қўяди. Шундай қилиб, у саломатликни яхшилаш ва қариш билан курашиш учун зарур бўлган барча озиқ моддаларни қабул қилади.

Николь Кидман — 54 ёш

Айтишларича, актриса овқатланишда 80/20 қоидасига амал қилади, бу ерда унинг рацонининг кўп қисмини соғлом (80 фоиз), қолган 20 фоизи эса ўзи истаган маҳсулот. Бу, албатта, парҳезнинг ажойиб усули, чунки у бўшашмасликка ёрдам беради ҳамда ҳеч нарса тақиқланмайди. Шу билан бирга, асосий озиқ-овқат парҳезбоп ҳисобланади. Асосийси, маҳсулотлар қайта ишланмаган бўлиши керак ва озиқ-овқат таркибига турли хил озуқа моддалари киритилиши керак. Бу актрисанинг ёш кўринишига ёрдам беради.