Зарафшон миллий табиат боғи Экология қўмитаси тизимига ўтказилиши мумкин

Экология ва атроф-муҳитни муҳофаза қилиш давлат қўмитаси «Зарафшон миллий табиат боғи фаолияти ва Судоче-Акпетки давлат буюртма қўриқхонасининг айрим масалалари тўғрисида»ги Вазирлар Маҳкамаси қарори лойиҳасини муҳокамага қўйди.

Қарор лойиҳасида Экология ва атроф-муҳитни муҳофаза қилиш давлат қўмитаси, Ўрмон хўжалиги давлат қўмитаси ва Самарқанд вилоят ҳокимлигининг Самарқанд вилояти Жомбой ва Булунғур туманлари ҳудудида жойлашган, умумий майдони 2426,2 гектар бўлган Зарафшон миллий табиат боғини штат бирликлари ва моддий-техник базаси билан бирга ҳамда молиялаштириш тартибини сақлаб қолган ҳолда Ўрмон хўжалиги давлат қўмитаси тасарруфидан Давлат экология қўмитаси тизимига ўтказиш кўзда тутилган.

Республика комиссияси икки ой муддатда:

• Зарафшон миллий табиат боғининг барча мол-мулки ва бошқа объектларини, шу жумладан, унинг питомнигидаги ҳайвонларини хатловдан ўтказиши;
• Зарафшон миллий табиат боғини штат бирликлари ва моддий-техник базаси билан бирга ҳамда амалдаги молиялаштириш тартибини сақлаб қолган ҳолда белгиланган тартибда Давлат экология қўмитасига қабул қилиниши-топширилишини таъминлаши керак.

Шунингдек, 2022 йил якунига қадар Зарафшон миллий табиат боғи ҳудудини қонунчилик талаблари асосида унинг қўриқхона, рекреация ва хўжалик мақсадида фойдаланиш зоналари чегаралари белгиланади; Фанлар академияси билан биргаликда табиий объектлар мониторинги юритилиши ва илмий-тадқиқот ишларининг ташкил этилади.

Бундан ташқари, Бухоро буғулари учун яшаш жойларини яхлит сақлаш, дарёда сув сатҳининг пасайиши натижасида қирғоқларидаги тўқайзорларга бўлаётган салбий таъсирнинг олдини олиш мақсадида миллий табиат боғи ҳудудини кенгайтириш бўйича Вазирлар Маҳкамасига асосланган таклиф киритилади.

Давлат экология қўмитасининг бюджетдан ташқари жамғарма маблағлари ҳисобидан Давлат солиқ қўмитаси ҳузуридаги Кадастр агентлиги билан биргаликда:

• Зарафшон миллий табиат боғи ер участкалари, бошқа кўчмас мулк объектлари ҳужжатларини белгиланган тартибда расмийлаштирилиши ва давлат рўйхатидан ўтказилиши;
• Судоче-Акпетки давлат буюртма қўриқхонаси ер участкаларини кадастр ҳужжатларига тегишли ўзгартиришлар киритилиши таъминланади.

Аввалроқ Вазирлар Маҳкамасининг «Ўрмон фонди ерларида муҳофаза этиладиган табиий ҳудудларни ташкил этиш билан боғлиқ қўшимча чора-тадбирлар тўғрисида»ги қарори қабул қилинганди. «Муҳофаза этиладиган табиий ҳудудлар тўғрисида»ги қонунга мувофиқ, Қорақалпоғистон, Наманган, Самарқанд ва Сурхондарё вилоятлари ўрмон фонди ерларида «Оролқум», «Поп», «Омонқўтон», «Юқори Тўпаланг» ва «Боботоғ» миллий боғлари ташкил этилади.