Жиззах прокуратураси Зарбдор ҳокимлиги мансабдорларига жиноий иш очди

Жиззах вилоятининг Зарбдор туманида балиқчилик учун ажратилган ердан бошқа мақсадларда фойдаланган хусусий корхона аниқланди, деб хабар беради вилоят ҳокимлиги матбуот хизмати.

Маълум қилинишича, Жиззах вилояти прокуратураси томонидан мавжуд сунъий балиқчилик ҳавзаларида «Балиқчилик тармоғини янада ривожлантиришнинг қўшимча чора-тадбирлари тўғрисида»ги президент қарори ижроси юзасидан текшириш жараёнлари ўтказилган.

Мазкур текшириш жараёнида аниқланишича, Зарбдор туман ҳокимининг тегишли қарори билан Ч.Н. раҳбарлигидаги «М.П» хусусий корхонасига балиқчиликни ривожлантириш мақсадида сунъий ҳавза яратиш учун жами 20 гектар сувли ер майдони ижарага ажратилган.

Туман ҳокимлиги масъул мансабдор шахслари томонидан мониторинг ишлари ўтказилмагани оқибатида «М.П» хусусий корхона раҳбари Ч.Н. ўзига ажратилган ердан ташқари қишлоқ хўжалиги маҳсулотлари етиштириш учун мўлжалланган 48 балл бонитетига эга бўлган жами 9 гектар ер майдонини ноқонуний эгаллаб, давлат ва жамият манфаатларига 4,4 миллиард сўм миқдорда зарар етказгани ошкор бўлган.

Ҳолат юзасидан Зарбдор туман ҳокимлиги масъул мансабдор шахсларига нисбатан Жиноят кодексининг 205-моддаси (ҳокимият ёки мансаб ваколатини суиистеъмол қилиш) ҳамда «М.П» хусусий корхона раҳбари Чўртанбой Наҳангбоевга нисбатан 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) бўйича жиноят иши қўзғатилиб, тергов ҳаракатлари олиб борилмоқда.

Аввалроқ Қарши шаҳрининг амалдаги ва собиқ ҳокими 156 миллиард сўм бўлган ерни ноқонуний бериб юборгани маълум бўлганди.