Бухородаги қурилиш моллари цехида ёнғин содир бўлди (видео)

Бухоро шаҳридаги қурилиш моллари цехида ёнғин содир бўлди, деб хабар беради ФВВ матбуот хизмати.

Маълум қилинишича, 19 апрель куни соат 01:50 да Бухоро шаҳридаги Саноатчилар кўчасида жойлашган қурилиш моллари (ҳар хил турдаги бўёқ) цехида ёнғин содир бўлаётгани тўғрисида вилоят ФВБга хабар келиб тушган. Шунга кўра 11 та ёнғин-қутқарув экипажи воқеа жойига соат 01:54 да етиб бориб, ёнғин соат 02:28 да қуршаб олинган ва соат 03:57 батамом ўчирилган.

Ёнғин натижасида цехнинг 1500 квадрат метр майдондаги том қисми ёниб зарарланган. Қутқарувчиларнинг тезкор ҳаракатлари натижасида цехнинг 10 минг квадрат метр майдон ёнғиндан сақлаб қолинган.

Ёнғин оқибатида тан жароҳати олган ва ҳалок бўлганлар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.

Таъкидланишича, воқеа жойига ФВБ раҳбарияти, ИИБ, прокуратура, ССБ ҳамда тегишли хизматларнинг куч ва воситалари жалб этилган.

Аввалроқ Самарқанддаги машина-трактор паркида ёнғин чиққани, Тошкентдаги озиқ-овқат дўконларининг бирида ёнғин содир бўлгани тўғрисида хабар берилганди.