2021-yilda Adliya vazirligi tomonidan korrupsiyaga qarshi ekspertizadan o‘tkazilgan loyihalarning 245 tasida 405 ta korrupsiyaviy omillar aniqlangan. Bu haqda AOKAda Adliya vazirligi va Korrupsiyaga qarshi kurashish agentligi mas’ul xodimlari ishtirokida o‘tgan matbuot anjumanida ma’lum qilindi.
Qayd etilishicha, 2021-yil yakuniga qadar Adliya vazirligi tomonidan 1 820 ta normativ-huquqiy hujjatlar loyihalari korrupsiyaga qarshi ekspertizadan o‘tkazilgan. Ushbu davrda kiritilgan loyihalarning 708 tasi yoki 39 foizida cheklist to‘ldirilmagan. Bu ushbu loyihalarning korrupsiyaga qarshi ekspertizadan o‘tkazilmaganligidan dalolat beradi.
Ma’lum bo‘lishicha, o‘tgan davr mobaynida Adliya vazirligi tomonidan korrupsiyaga qarshi ekspertizadan o‘tkazilgan loyihalarning 245 tasida 405 ta korrupsiyaviy omillar aniqlangan. Shundan 114 ta loyiha alohida tartibda korrupsiyaga qarshi ekspertizadan o‘tkazilganda ularning 83 tasida 237 ta korrupsiyaviy omillar aniqlangan.
Shuningdek, 2022-yil I choragi davomida kiritilgan 584 ta loyihalarning 163 tasiga yoki 28 foiziga korrupsiyaviy omillarni aniqlash bo‘yicha cheklist ilova qilinmagan. Bu esa ushbu loyihalarning ishlab chiquvchilari tomonidan korrupsiyaga qarshi ekspertizadan o‘tkazilmaganligini bildiradi.
Ushbu davrda Adliya vazirligi tomonidan korrupsiyaga qarshi ekspertizadan o‘tkazilgan loyihalarning 74 tasida 122 ta korrupsiyaviy omillar aniqlangan. Shu bilan birga, 34 ta loyihaga cheklist ilova qilinmaganligi sababli loyihalar ekspertizadan o‘tkazilmay qaytarilgan.
2021-yil davomida Adliya vazirligi tomonidan manfaatdor vazirlik va idoralar bilan birgalikda jami 892 ta amaldagi normativ-huquqiy hujjatlar korrupsiyaga qarshi ekspertizadan o‘tkazilib, ularning 224 tasida 660 dan ortiq korrupsiyaviy omillar aniqlangan.
Izoh (0)