Тошкент вилоятининг Янгийўл туманида содир бўлган йўл-транспорт ҳодисаси оқибатида икки киши ҳалок бўлди, деб хабар беради ЙҲХХ ахборот хизмати.
Маълум қилинишича, 18 апрель куни соат 06:15 ларда Тошкент вилояти Янгийўл тумани ҳудудидан ўтувчи М-39 автомобиль йўлининг 829-километрида 42 ёшли ҳайдовчи У.I. Lada-Largus русумли автомобилида ҳаракатланаётиб, ухлаб қолиши натижасида йўлнинг ўнг четида тўхтаб турган ҳайдовчи У.У. (1976 йилда туғилган) бошқарувидаги Isuzu русумли юк автомобилнинг орқа томонига тўқнашган.
Ҳодиса оқибатида Lada-Largus автомобили йўловчилари — 39 ёшли М.О. ва 12 ёшли О.Ж. олган оғир тан жароҳатлари туфайли воқеа жойида вафот этган. Шунингдек, яна бир йўловчи шифохонага ётқизилган.
Мазкур ЙТҲ юзасидан Янгийўл тумани ИИБ ҳузуридаги Тергов бўлими томонидан дастлабки тергов ҳаракатлари олиб борилмоқда.
Эслатиб ўтамиз, 14 апрель куни Сурхондарё вилояти Ангор тумани ҳудудидан ўтувчи 4Р-102 автомобиль йўлида Nexia-3 автомашинаси ҳайдовчиси ҳаракатланиш чоғида бошқарувни йўқотган ва қарама-қарши томондан келаётган яна бир Nexia-3 машинаси билан тўқнашганди. Оқибатда автотранспорт воситаларининг бирида ёнғин юзага келган. Йўловчилар — Қ.Р. (23 ёшли, эркак), А.Й. (23 ёшли, аёл) ва ҳайдовчи О. ҳаёт учун хавфли бўлган оғир тан жароҳати олиб, воқеа жойида ҳалок бўлган.
Изоҳ (0)