Сирдарё вилоятининг Оқолтин тумани Сардоба шаҳарчаси ҳудудида юк машинаси билан тўқнашган Cobalt ёниб кетди, деб хабар беради вилоят ФВБ ахборот хизмати.
Маълум қилинишича, 18 апрель куни соат тахминан 07:35 да Оқолтин тумани Сардоба шаҳарчаси ҳудудидан ўтган А-373 йўлининг 4-километрида фуқаро О.С бошқарувида бўлган оқ рангли Cobalt машинаси ва юк автомобили иштирокида йўл-транспорт ҳодисаси юз берган. Оқибатда енгил машинада ёнғин чиққан.
Ёнғиндан Cobalt’нинг олд капот ва салон қисми ёниб зарарланган. Воқеа жойига зудлик билан Оқолтин тумани ФВБдан 2 та ёнғин-қутқарув экипажи етиб борган ва тез фурсатда ёнғин тўлиқ бартараф этилган. Ҳодиса оқибатида инсонларнинг ўлими ва тан жароҳати олиш ҳолатлари кузатилмаган.
Ҳозирда ФВБ ҳамда ИИБ ЙҲХБ томонидан дастлабки суриштирув ишлари олиб борилмоқда.
Аввалроқ Жиззахда бир-бири билан тўқнашган Nexia’лардан бири ёниб кетиши оқибатида бир киши ҳалок бўлгани ва яна уч киши жароҳат олгани тўғрисида хабар берилганди.
Изоҳ (0)