Jizzax viloyati hududidan o‘tuvchi Zafarobod—Paxtakor avtomobil yo‘lida Nexia avtomobili yonib ketdi, deb xabar beradi viloyati FVB axborot xizmati.

Ma’lum qilinishicha, 17-aprel kuni soat 19:09 larda Jizzax viloyati Favqulodda vaziyatlar boshqarmasiga 4P-190 avtomobil yo‘lining Jizzax viloyatining Zafarobod tumani hududidan o‘tuvchi qismida Nexia avtomobili yonayotgani to‘g‘risida xabar kelib tushgan.

Xabarga asosan yong‘in joyiga Zafarobod tumani FVBdan yong‘in-qutqaruv ekipaji yuborilgan. Qutqaruvchilar yong‘in joyiga soat 19:14 da yetib borishgan, soat 19:19 da yong‘in batamom o‘chirilgan.

Aniqlanishicha, Zafarobod—Paxtakor yo‘nalishida harakatlanayotgan Nexia-2 mashinasi haydovchisi boshqaruvni yo‘qotishi va qarama-qarshi yo‘nalishdagi Nexia-3 mashinasi bilan to‘qnashuvi natijasida mashinada yong‘in kelib chiqqan.

Yo‘l-transport hodisasi oqibatida bir nafar fuqaro vafot etgan, yana uch nafar fuqaro turli tan jarohatlari bilan tuman tibbiyot birlashmasiga yotqizilgan.

Eslatib o‘tamiz, 14-aprel kuni Surxondaryo viloyati Angor tumani hududidan o‘tuvchi 4R-102 avtomobil yo‘lida Nexia-3 avtomashinasi haydovchisi harakatlanish chog‘ida boshqaruvni yo‘qotgan va qarama-qarshi tomondan kelayotgan yana bir Nexia-3 mashinasi bilan to‘qnashgandi. Oqibatda avtotransport vositalarining birida yong‘in yuzaga kelgan. Yo‘lovchilar — Q.R. (23 yoshli, erkak), A.Y. (23 yoshli, ayol) va haydovchi O. hayot uchun xavfli bo‘lgan og‘ir tan jarohati olib, voqea joyida halok bo‘lgan.

Avvalroq Qamchiq dovonida suyultirilgan gaz ortilgan yuk mashinasi beton to‘siqqa urilib, ag‘darilishi oqibatida haydovchi halok bo‘lgani to‘g‘risida xabar berilgandi.