Афғонистон «Ўзбекистон темир йўллари» АЖ билан ҳамкорликни тўхтатишни режалаштираётгани ҳақидаги ОАВда тарқалган хабарларни рад этди. Бу ҳақда «Ўзбекистон темир йўллари» матбуот хизмати хабар берди.
Маълум қилинишича, Термизда 12—14 апрель кунлари «Ўзбекистон темир йўллари» бошқарув раҳбарларининг Афғонистон темир йўллари бошқармаси бошлиғи Бахтулраҳмон Шарафат бошчилигидаги делегацияси билан учрашуви бўлиб ўтди.
Унда Афғонистон томони Ўзбекистонга икки томонлама муносабатларни мустаҳкамлаш, Афғонистонга/Афғонистондан юк ташиш ҳажмини ошириш бўйича кўрилаётган чора-тадбирлар ва саъй-ҳаракатлар, шунингдек, юкларни ўз вақтида қайта ишлашда кўрсатилаётган ёрдам учун миннатдорлик билдирди.
Учрашувда, шунингдек, Афғонистон «Ўзбекистон темир йўллари» билан ҳамкорликни тўхтатишни режалаштираётгани ҳақида ОАВда тарқалган хабарларни рад этган.
Бундан бир неча кун аввал Афғонистон нашрлари мамлакат темир йўлларини бошқариш бўйича шартномаларни қайта кўриб чиқишни режалаштираётгани ҳақида хабар эълон қилганди. Унда шартномалар мамлакат манфаатлари ҳисобга олинмаган ҳолда тузилгани ва ҳозирда ҳар йили миллионлаб долларлар хорижий компанияларга кетиб қолаётгани айтилган.
16 апрель куни ТОЛО News Ўзбекистон 10 майдан сўнг Ҳайратон–Мозори Шариф темир йўл бошқарувини Афғонистонга топширишини хабар қилганди.
«Ўзбекистон темир йўллари» хабарида айтилишича, аксинча, Бахтулраҳмон Шарафат икки томонлама ҳамкорликни мустаҳкамлаш ва уни янада кенгайтириш режасини алоҳида таъкидлади. Афғонистон томони «Ўзбекистон темир йўллари» таркибига кирувчи «Сўғдиёна транс» шўъба корхонасининг Ҳайратон–Мозори-Шариф темир йўл линияси эксплуатацияси бўйича 2021 йилдан буён амалга ошириб келаётган ишларидан тўлиқ мамнунлигини билдирган.
Музокаралар давомида Мозори Шариф—Кобул—Пешовар темир йўли қурилиши лойиҳасини амалга оширишни жадаллаштириш масаласи ҳам муҳокама қилинган.
Изоҳ (0)