Самарқанд вилоятининг Булунғур туманида газ баллони чақнашидан куйиш тан жароҳатини олган эр-хотин ва уларнинг 10 ёшли қизи вафот этди. Бу ҳақда Булунғур туман тиббиёт бирлашмаси шифокорига таяниб, «Дарё» мухбири хабар берди.
Кеча, 15 апрель куни чақнашдан 90 фоиз куйган она ва қизи вафот этган бўлса, бугун оила боши оламдан ўтган.
Аввалроқ Булунғурдаги хонадонларнинг бирида носозлиги айтилган газ баллонида чақнаш содир бўлгани, оқибатда бир оиланинг уч нафар аъзоси куйиш тан жароҳатини олиб, шифохонага ётқизилгани ҳақида хабар берилганди.
Мазкур фожиа ҳақида «Дарё» мухбирига гапириб берган марҳумнинг укаси Жамол Нарзуллаев: «‘Тумангазъдан одам келиб бу газ баллон бизники эмас деб, тан олмай кетган. Шунга жаҳлим чиқяпти. Бозордан сотиб олганимиз йўқ. Биз иккита газ баллон олганмиз. Уларнинг ҳужжатлари ҳам бўлиши керак. Газ баллон чиқарадиган заводимиз бўлмаса, уни ясаб бўлмаса, қандай уни тан олмаслиги мумкин? Ҳар икки ойда уни кўрикдан ўтказиш муддати бўлади. Буни текшириб кўрганда рақамлари бор экан ва унинг яроқлилик муддати ўтиб кетган экан», — деганди.
Мазкур айбловга жавоб берган «Булунғуртумангаз»нинг суюлтирилган газ таъминоти бўлими бошлиғи Мирзоҳид Ҳакимов эса чақнаш содир бўлган газ баллони уларга тегишли эмаслигини айтиб, «Ўрганганимизда техника хавфсизлик қоидалари қўпол равишда бузилганлиги, газ баллон бизга тегишли эмаслиги, унинг жўмрагига симдан ясама очиш ускуналари ясаб қўйилгани маълум бўлди», — деганди.
Кейинчалик Самарқанд вилоят ИИБ ҳолат юзасидан жиноят иши қўзғатилиб, тергов суриштирув жараёнлари бошланганини маълум қилганди.
Мавзуга доир:
- «Ўғли отасига ёрдам бермоқчи бўлган ва у ҳам 20 фоиз куйган». Қашқадарёда яшин уриш ҳолати юзасидан қўшимча маълумот берилди
- Булунғурда газ баллондаги чақнаш сабаб уч киши 80–90 фоиз куйиш тан жароҳатини олди. «Райгаз» портлаган баллон «бизга тегишли эмас» демоқда
- Самарқандда газ идорасидаги кондиционердан чиққан суюқлик уч кишининг куйишига сабаб бўлди
Изоҳ (0)