Судлар тизимида фуқаролар ўз низосини ҳал қилиш учун қайси судга мурожаат қилишини аниқлашда ёрдам берадиган ягона дарча тамойилини кенг жорий этиш белгиланмоқда. Бу ҳақда 14 апрель куни АОКАда бўлиб ўтган матбуот анжуманида Олий суд раисининг биринчи ўринбосари Робахон Маҳмудова маълум қилди, дея хабар бермоқда «Дарё» мухбири.
Робахон Маҳмудованинг айтишича, Олий суд томонидан ишлаб чиқилган янги қонун лойиҳасида судлар тизимида ягона дарча тамойилини жорий этиш назарда тутилган.
«Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси ишлаб чиқилди. Хабарингиз бор, айрим ҳолларда ишларни судларда тааллуқлиги бўйича амалиётда муаммолар келиб чиқиб, фуқаролар ўз низосини ҳал қилиш учун қайси судга – фуқаролик ишлари бўйича судгами, иқтисодий ёки маъмурий судга мурожаат қилишида тушунмовчиликлар келиб чиқмоқда. Бу эса фуқароларнинг оворагарчиликларига сабаб бўлаётган эди. Шу муносабат билан янги қонун лойиҳасига асосан, судлар тизимида ягона дарча тамойилини кенг жорий этиш, жумладан судлар томонидан даъво аризаси, ариза ҳамда шикоятни судга тааллуқли бўлмаганлиги сабабли қабул қилишни рад этиш ёки иш бўйича иш юритишни тугатиш амалиётини тақиқлаш каби процессуал нормалар белгиланмоқда.
Бунда, даъво аризаси, ариза ёки шикоят, уларни кўриб чиқишга ваколатли судга ўтказилади. Натижада фуқароларнинг оворагарчиликлари олди олиниб, уларнинг низолари тааллуқли суд томонидан ўз вақтида кўриб чиқилади. Яъни бунда фуқаролар эмас, ҳужжатлар суддан судга ҳаракатланади», — деди раис ўринбосари.
Робахон Маҳмудованинг қўшимча қилишича, янги қонун лойиҳасига маъмурий судларнинг ҳал қилув қарорлари ижро қилинмаган тақдирда, давлат органларининг мансабдор шахсларига нисбатан «ошиб борувчи» суд жарималарини қўллаш тартиби киритилмоқда.
«Бунда, давлат органлари ёки ташкилотлари маъмурий суднинг ҳал қилув қарорини у қонуний кучга кирган кундан бошлаб белгиланган муддатда ижро қилиш ҳамда бу ҳақда маъмурий судга хабар бериши керак бўлади. Қонуний суд қарори чиқарилгани билан, агар у ижро этилмаса, низо оҳиригача ҳал этилмаган ҳисобланади. Шу сабабли, жарималарни қўлланилиши, суд қарорларининг ижро этилишида таъсирчан механизм сифатида, фуқароларнинг ҳуқуқ ва манфаатларини тўлиқ таъминлашга замин яратади», — деди Олий суд раҳбари ўринбосари.
Аввалроқ Ўзбекистонда суд ҳужжатларини ижро этишга аралашганлик учун жавобгарлик белгилангани хабар қилинганди.
Изоҳ (0)