Президент томонидан имзоланган қонун билан суд ҳужжатларини ва бошқа органлар ҳужжатларини мажбурий ижро этиш жараёнига аралашганлик учун маъмурий ва жиноий жавобгарлик киритилди. Бу ҳақда Telegram’даги «Ҳуқуқий ахборот» канали хабар берди.
Унга кўра, мазкур ҳаракатлар маъмурий жазо қўлланилганидан кейин содир этилса, 1 йилдан 3 йилгача озодликни маҳрум қилиш билан жазоланиши мумкин.
Шунингдек, йирик битимлар тузишда, молия-кредит хизматларини кўрсатишда, халқаро йўловчи ташиш ва давлат хизматларини кўрсатишда ижро ҳужжатлари бўйича қарздорлик борлигини текширмаслик ҳам маъмурий жавобгарликка сабаб бўлади.
Қонун билан ижро ишини юритишнинг соддалаштирилган тартиби белгиланган. Унга кўра, соддалаштирилган тартибда ундирув қарздорнинг мол-мулкига (пул мустасно) қаратилмайди ва қарздорга жавобгарлик чоралари қўлланилмайди.
Соддалаштирилган тартибда ундирув банкдаги пулга, Меҳнатга ҳақ тўлашнинг энг кам миқдоридан (822 минг сўмдан) кўп бўлмаган суммани ундириш учун эса иш ҳақига, стипендия, пенсия ва бошқа даромадларга қаратилади.
Эслатиб ўтамиз, «Судлар тўғрисида»ги қонун янги таҳрирда 2021 йил 28 июль куни президент томонидан имзоланган ва 29 июлдан бошлаб кучга кирганди. Танги таҳрирдаги қонунда судьялар мақоми, уларнинг мустақиллиги кафолатлари янада мустаҳкамланган ва судья лавозимига номзодлар ва сайланган шахсларга қўйилган талаблар халқаро стандартларга мувофиқ ишлаб чиқилган.
Изоҳ (0)