Ўзбекистонда Соғлиқни сақлаш вазирлиги ҳамда президентининг расмий веб-сайтларига ўхшаш бўлган сохта веб-ресурслар орқали фуқаролардан банк пластик карта маълумотларини тақдим этилишига эришиб, ундаги маблағлар ўзлаштириб келинаётгани аниқланди, деб хабар беради ИИВ Киберхавфсизлик маркази.
Хусусан, Telegram тармоғидаги бир қатор гуруҳ ва каналларда Соғлиқни сақлаш вазирлиги номидан COVID-19 га қарши вакцинациядан ўтган фуқаролар бир маротабалик 750 минг сўм пул маблағларини беришга оид фейк хабар тарқатилиб, ушбу хабар остига бириктирилган ҳаволага кирилганида 750 минг сўмни олиш илинжида бўлган фойдаланувчилардан банк пластик карта реквизитлари ҳамда SMS хабарномада кўрсатилган махфий код-рақам сўралаётгани маълум бўлган.
Шунингдек, ижтимоий тармоқларда Ўзбекистон президенти номидан ижтимоий ва демографик ҳолатни яхшилаш учун фарзанди бор оилаларга бир маротабалик 650 минг сўм пул маблағларини моддий ёрдам сифатида беришга оид қонун кучга киргани тўғрисидаги фейк хабар тарқатилган. Хабар остидаги ҳаволага кирилганда 650 минг сўм олишга эришиш учун фойдаланувчидан ўз банк пластик карта рақамларини ҳамда SMS хабарномада кўрсатилган махфий код сўралади ва «эҳтиёжманд мижоз» ушбу маълумотларни киритгач, пластик картасидаги мавжуд пул маблағларидан маҳрум бўлиши аниқланган.
Тезкор тадбирлар натижасида бу каби фейк хабар таъсирига тушган 1 нафар фуқаронинг 7,5 миллион сўм пул маблағлари Тошкент шаҳрида яшовчи 22 ёшли И.Р. томонидан фирибгарлик йўли билан ўзлаштирилгани аниқланиб, ҳолат юзасидан Юнусобод тумани ИИО ФМБ томонидан Жиноят кодексининг 168-моддаси (фирибгарлик) билан жиноят иши қўзғатилган.
Аввалроқ фирибгарлар Ўзбекистон президенти сайти сохта ҳаволасини яратиб, пластик карталардан пул ўғирламоқчи бўлгани аниқланганди.
Изоҳ (0)