Иқтисодий тадқиқотлар ва ислоҳотлар маркази Ўзбекистон кўчмас мулк бозоридаги ҳозирги вазиятни таҳлил қилди. Бу ҳақда марказ матбуот хизмати «Дарё»га маълум қилди.
Таҳлил натижаларига кўра, ушбу секторда февраль ойига нисбатан бир оз пасайиш кузатилган бўлса-да, умумий савдо ҳажми деярли бир хил даражада сақланиб қолди. Шу билан бирга, нархларнинг ошишига қарамай, кўчмас мулк бозори фаоллигича қолмоқда.
Жорий йил март ойида Ўзбекистонда кўчмас мулк олди-сотди шартномалари сони 20,3 минг донани ташкил этди. Бу эса февраль ойига (22 минг) нисбатан 7,6 фоизга камроқдир. 2021 йилнинг мос даврига (20,2 минг) нисбатан ўсиш 0,3 фоизни ташкил этди.
Кўчмас мулк олди-сотдиси бўйича расмийлаштирилган шартномалар сони ўзгариши
Ҳудудлар кесимида ўсиш суръати фақатгина Навоий вилоятида (25 фоиз) қайд этилди. Кўчмас мулк олди-сотди битимлари сонининг энг катта камайиши Хоразм (24 фоиз), Сирдарё (20 фоиз) ва Наманган (19 фоиз) вилоятларида кузатилди.
Таҳлил натижалари Тошкент вилояти ва Тошкент шаҳри кўчмас мулк бозорида талаб мос равишда 1 ва 5,8 фоиз камайганини кўрсатмоқда.
Тошкент шаҳри ва Тошкент вилоятида кўчмас мулк олди-сотдиси бўйича тузилган шартномалар сони
Иккиламчи уй-жой бозорида нархлар ўзгариши
Марказ ҳисоб-китобларига кўра, март ойида иккиламчи бозорда уй-жой ўртача нархлари ўтган ойга нисбатан 1,9 фоизга пасайган (февраль ойида ўсиш 1,7 фоизни ташкил этган эди).
Ҳудудлар кесимида турар-жой нархларининг энг юқори ўсиш суръатлари Сурхондарё (6 фоиз), Тошкент шаҳри (2,4 фоиз) кузатилган бўлса, Сирдарё (-11,6 фоиз), Андижон (-7,6 фоиз) ва Наманган (-5,4 фоиз) вилоятларида нархларнинг пасайиши қайд этилди.
Тошкент шаҳри ва вилоят административ марказларида иккиламчи уй-жой бозоридаги нархлар ўзгариши (1 кв метр учун АҚШ доллари)
Иккиламчи уй-жой бозоридаги нархларнинг ўзгариши olx.uz сайтида жойлаштирилган маълумотлар асосида ҳисоб-китоб қилинган. Маълумотлар Web Scraping методи орқали йиғилган.
Мутахассисларнинг таъкидлашича, давлатнинг уй-жой дастурлари кўчмас мулк бозорида таклиф ўсишини, шунингдек фуқароларнинг уй-жой сотиб олиш қобилиятини қўллаб-қувватлашда давом этмоқда.
Бундан ташқари, ипотека фоиз ставкалари 2022 йил охиригача ўзгаришсиз қолади. Молия вазирлиги томонидан банкларга ажратилган ресурс маблағлари бўйича ставкалар ва ипотека кредитлари бўйича ставкалар (13 фоиз) 2022 йил охиригача шу тарзда сақланиб қолади.
Март ойида Марказий банк асосий ставкани 17 фоизгача оширганидан сўнг, янги кредитлар бўйича фоиз ставкалари ошиши керак эди. Бироқ давлат раҳбари йил охирига қадар аввалги ставкаларни сақлаб қолиш бўйича топшириқ берди.
Изоҳ (0)