Уч ёшли боланинг катта саҳнага чиқишини ёки беш ёшида фильмда асосий ролни ижро этишини тасаввур этиш қийин. Аммо баъзи болалар бу ишни уддалашади. «Дарё» мухбири Наргизахон Муродова болалигидан санъатга талпинган ва халқ меҳрини қозонган болакайларнинг айни кунларда нималар билан банд эканлигига қизиқди.
Шоколад пастаси рекламасидаги болакай
Темур Муродуллаев 5 ёшида шоколад пастасининг рекламасида суратга тушиб, томошабинлар эътиборини тортганди. Ундан кейин «Дада», «Иншо» ва «Сенсиз» каби фильмларда катта-кичик ролларни ижро этди. Ўн олти ёшни қаршилаган Темур айни кунларда инглиз тили ва математикадан қўшимча дарсларга бормоқда. Бундан ташқари, у бир неча йилдан буён бокс билан ҳам шуғулланади.
— Беш ёшимда кутилмаганда омад кулиб реклама ролигида суратга тушганман. Ундан кейин фильмларга таклиф қилишди. Санъатни ёқтираман, аммо келажагимни у билан боғлаш ниятим йўқ. IТ бўйича мутахассис бўлишни ва бир нечта тилларни ўрганишни истайман. Мен суратга тушган реклама ролигини ҳалигача намойиш этишади. Баъзан уяламан, ўша пайтдаги хатти-ҳаракатларим ғалати туюлади, — дейди Темур Муродуллаев.
Дилноза Кубаеванинг ўғлини гавдалантирган бола
Камрон Саидмуродов 7 ёшидан санъатга қадам қўйган. У «Тантана» гуруҳида қўшиқ куйлаб, кўплаб байрам томошаларида иштирок этган. Илк ролини эса 2014 йили суратга олинган «Фарзандим-2» фильмида ижро этган. У Дилноза Кубаева, Адиз Ражабов, Муяссар Бердиқулова, Саида Саидбекова каби маҳоратли ижодкорлар билан рол ижро этган.
— Ҳозир Россия кинематография институтида таҳсил оляпман. Президентимизнинг қарорларига кўра, юртимиздаги 15 та энг иқтидорли ёшлар Россияга ўқишга юборилди. Бизга Ўзбекистон томонидан давлат стипендияси ажратилган. Бундан ташқари, институт томонидан ҳам стипендия берилади. Актёрлик бўйича ўқиб, Ўзбекистонга қайтаман, — дейди Камрон Саидмуродов.
«Чол ва набира»даги йигит тадбиркор бўлмоқчи
Маъруф Шарипов «Чол ва набира» фильмидаги Ғанишер роли билан томошабинларга яхши маълум. Болаликдан қўшиқ айтишга қизиққан Маъруф бобоси сабаб «Томоша» гуруҳига қатнайди. Бир куни машғулотга «Ўзбеккино»дан бир гуруҳ ижодкорлар келиб, 5-6 ёшдаги болалар билан суҳбатда бўлишади. Чунки драматург Рихсивой Муҳаммаджонов илк режиссёрлик иши — «Чол ва набира» фильмини суратга олиш ниятида эди. Маъруф Шарипов кастингдан ўтиб, 6 ёшида Пўлат Саидқосимов билан суратга тушади. Ундан сўнг «Энагалар», «Умид» ва «Тубанлик» каби фильмларда кичик ролларни ижро этди.
— Йигирма ёшга тўлганман. Айни дамда тадбиркорлик сирларини ўрганяпман. Иқтисод ва хориж тилларига қизиқаман. Санъатга иштиёқим бор, аммо фақат актёр бўлиб қолиш ниятим йўқ, — дейди Маъруф Шарипов.
Тили чиқмай қўшиқ айтган Абдулҳаким
— Бу йил 16 ёшга тўлдим. Айни дамда Вестминстер университети қошидаги академик лицейда таҳсил оламан. Санъаткор бўлиш ниятим йўқ. Инглиз тили ва математикани ўрганиб, халқаро тоифадаги тадбиркор бўлмоқчиман, — дейди Абдулҳаким Тоштемиров.
Жўрабек Жўраев илк қўшиғини тўрт ёшида ижро этган. «Чаки-чаки» қўшиғи шу кунгача YouTube тармоғида 6 миллиондан ортиқ марта томоша қилинган. Ундан кейинги «Араб тангоси» қўшиғи ҳам тингловчилар эътиборига тушган. Жўрабек Жўраев 6 ёшида Андрей Малахов шоусида ўзбекистонлик интернет юлдузи сифатида иштирок этган. Ҳозирда 14 ёшни қарши олган Жўрабек профессионал санъаткор бўлишни ният қилган.
— Ҳозирги кунда таҳсил олиш билан бандман. Устозим режиссёр Саъдулла Абдуллаевнинг концерт дастурларида иштирок этаман. Тўй тантаналарга ҳам таклиф этишади. Келажакда халқнинг севимли хонандаси бўлишни орзу қиламан, — дейди Жўрабек Жўраев.
Хадича актрисалик эмас, опера хонандалигини танлади
Хадича Имомназарова хусусий фильмлардаги катта-кичик роллари билан томошабинларга яхши таниш. У илк ролини 2007 йил суратга олинган «Зумрад ва Қиммат» фильмида ижро этган. Ундан сўнг «Нортой», «Ошиқлар» ва «Мен юлдузман» каби фильмларда суратга тушган. Аммо у актриса бўлишни истамади ва академик хонандалик йўналишини танлади. У бир неча йилдан буён опера ижрочилиги билан шуғулланади. 2019 йилда «Ниҳол» номидаги давлат мукофотини ҳам қўлга киритган.
«Йиғламагин»даги Мурод режиссёр бўлди
Режиссёр Рустам Саъдиевнинг «Йиғламагин» фильми 2009 йилнинг энг омадли картиналаридан бири бўлган. Мирафзал Шофайзиев «Йиғламагин», «Эътиқод» ва «Осий банда» каби фильмларда ва бир қатор клипларда суратга тушди. Мирафзал Шофайзиев шу кунгача қатор режиссёрларнинг ёрдамчиси бўлиб ишлаган. Ҳозирги кунда режиссёр сифатида реклама роликлари ва клипларни суратга олади.
— Илк ролимни ўн икки ёшимда ижро этганман. Ундан аввал Рустам Саъдиевнинг «Келгинди келин» фильмининг кастингида иштирок этгандим. Афсуски, унда омад кулиб боқмаган. Ўшанда Рустам ака кейинги фильмидан рол беришни кўзлаб қўйган экан. Тўрт йилдан сўнг «Йиғламагин» фильмига таклиф этганди, — дейди Мирафзал Шофайзиев.
Мавзуга доир:
- «Кичкина табиб»даги Нигора, «Чол ва набира»даги Ғанишер: болалигиданоқ томошабинлар эътиборини қозонган актёрлар ҳозир қандай кўринишда? (фото)
- «Муҳаббат синовлари»даги Рухшона, «Опа-сингиллар»даги Насиба ва кинода «ярқ этиб», кейин кўринмай қолган бошқа қаҳрамонлар ҳозир қаерда? (фото)
- «Тубанлик»даги Дилроз — актриса Зиёда Худойқулова нега кинони тарк этди? (фото)
- «Келинлар қўзғалони»даги Аббос — туғруқхонадаги учрашув сабаб кинога қадам қўйгани ҳамда болалигидаги роллари учун катталарникидек гонорар олгани ҳақида
- Эпизод роллари билан эътибор қозонган ёш актёр Мирафзал Шофайзиев ҳозир қаерда? (фото)
Изоҳ (0)