SpaceX ва Tesla компаниялари асосчиси Илон Маск Twitter ижтимоий тармоғи директорлар кенгашига кирмасликка қарор қилди. Бу ҳақда Reuters хабар бермоқда.
Бу ҳақда компания бош директори Параг Агравал маълум қилди. Унга кўра, Маск Twitter’нинг энг йирик акциядори бўлиб қолади ва унда компанияга таклиф бериш имконияти сақланиб қолади. Бу қарорга нима сабаб бўлганига аниқлик киритилмади.
Маскга директорлар кенгаши аъзолиги таклиф қилинди ва унинг тайинланиши шанба куни кучга кириши керак эди. Аммо ўша куни эрталаб Илон Маск директорлар кенгашида бўлмаслигини маълум қилди, — деб ёзди Агравал Twitter саҳифасида.Twitter бош директори Параг Агравал илова акциядорларини директорлар кенгашига аъзоликдан қатъи назар қадрлашини ва бундан кейин ҳам бу давом этишини таъкидлади.
4 апрель куни Маск Twitter’нинг 9,2 фоиз акциясини сотиб олганди. Бу уни компаниянинг энг йирик индивидуал акциядорига айлантирди. Маск компания улушини сотиб олганидан кейин Twitter акциялари қиймати 26 фоизга ошган.
Аввалроқ Forbes журнали Илон Маскни дунёдаги энг бой одам деб эълон қилган эди.
Изоҳ (0)