«Ювентус» «Бавария» етакчиларидан бирини нишонга олди

Туриннинг «Ювентус» жамоаси ёзги трансфер ойнасида «Бавария» ҳужумчиси Серж Гнабри учун кураш олиб боради.

«Реал» ва «Ливерпуль» қизиқиш билдираётган Гнабрига «бянконерилар» ҳам таклиф билан чиқмоқчи. Футболчи учун курашда ғолиб бўлиш учун туринликлар яхшироқ молиявий таклиф билан чиқишига тўғри келади.

«Бавария» футболчини олиб қолишга ҳаракат қилмоқда, аммо Сержнинг ўзи фаолиятида ўзгариш қилмоқчи.

Аввалроқ «Реал» вингернинг вакиллари билан алоқага чиққани, Мадрид жамоаси 5 йилдан буён мунтазам футболчининг ўйинини кузатиб келгани, «Ливерпуль» эса Гнабрини Муҳаммад Салоҳга ўринбосар сифатида кўраётгани хабар қилинганди.

Германиялик вингер «Штутгарт» жамоаси тарбияланувчиси ҳисобланади. 26 ёшли футболчи фаолияти давомида «Арсенал», «Вердер» ва «Ҳоффенҳайм» каби жамоалар шарафини ҳимоя қилган. 2017 йил июнь ойида «Бавария» футболчини харид қилган. Шундан буён немис футболчиси мюнхенликлар билан 3 марта Бундеслига, бир марта Чемпионлар Лигасида зафар қучган.

Серж Гнабри 2021/22 йилги мавсум мюнхенликлар сафида барча мусобақаларда 38 та ўйинда иштирок этиб, 14 та гол ва 7 та голли узатмага муаллифлик қилди.