«Реал» ярим ҳимоячиси Эден Азар Лондон клубига ўтиши мумкин.
Foot Mercato хабарига кўра, 31 ёшли бельгиялик футболчининг хизматларига «Арсенал» клуби қизиқиш билдирмоқда.
Инглиз клуби вакиллари Азарнинг атрофидагилари билан учрашиб, келаси мавсум учун ижара масаласини муҳокама қилган. «Реал» ҳам футболчининг формасини тиклаб, ўйин амалиётига эга бўлишини хоҳламоқда, ушбу ҳолатда клуб уни бир йилдан кейин сотиш имкониятига эга бўлади. Бироқ футболчининг ўзи Мадриддан кетишни истамаяпти. У ҳамон клубда ўзини кўрсата олишига ишонмоқда.
Аввалроқ, бельгиялик футболчи жароҳати сабаб мавсумнинг қолган қисмини ўтказиб юбориши ҳақида маълумот берилганди. «Реал» ёзда деярли 10 нафар футболчиси билан хайрлашмоқчи эканлиги, уларнинг орасида Эден Азар ҳам борлиги хабар қилинганди.
Эден Азар 2021/22 йилги мавсум Ла Лигада 17 та ўйинда майдонга тушиб, битта голли узатмага муаллифлик қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)